కాశీలో స్నానం.. కొల్హాపూర్‌లో భిక్ష.. మాహుర్‌లో నిద్ర.. దత్తాత్రేయ స్వామి క్షేత్ర విశేషాలు

మహారాష్ట్రలోని నాందేడ్ జిల్లాలో ఉన్న మాహుర్ పట్టణం దత్తాత్రేయ స్వామి భక్తులకు ముఖ్యమైన పుణ్యక్షేత్రంగా ప్రసిద్ధి చెందింది. హిందూ పురాణాల ప్రకారం బ్రహ్మ, విష్ణు, మహేశ్వరుల అంశల సమ్మేళనంగా దత్తాత్రేయ స్వామి అవతరించారు. అత్రి మహర్షి, అనసూయ దేవి వరపుత్రుడిగా ఆయనను కొలుస్తారు. అవధూతగా, ఆధ్యాత్మిక గురువుగా దత్తాత్రేయ స్వామికి ప్రత్యేక స్థానం ఉంది. శ్రీ గురు చరిత్రలోనూ మాహుర్ క్షేత్ర ప్రస్తావన కనిపిస్తుంది. సంప్రదాయ విశ్వాసం ప్రకారం దత్తాత్రేయ స్వామి కాశీలోని గంగానదిలో స్నానం చేసి, కొల్హాపూర్‌లో భిక్ష స్వీకరించి, మాహుర్‌లో నిద్రిస్తారని చెబుతారు. ఈ విశ్వాసానికి గుర్తుగా ఇక్కడ దత్తాత్రేయ స్వామి ఆలయం వెలసిందని భక్తులు భావిస్తారు.

మాహుర్ పర్వత శ్రేణుల్లో మూడు కొండలపై మూడు ప్రధాన ఆలయాలు ఉన్నాయి. ఒక కొండపై రేణుకాదేవి ఆలయం, మరో కొండపై అత్రి మహర్షి, అనసూయ దేవి ఆలయం, మూడో కొండపై దత్తాత్రేయ స్వామి ఆలయం ఉన్నాయి. దత్తాత్రేయ స్వామి ఆలయం వరకు వాహనాల్లో చేరుకోవచ్చు. మిగిలిన ఆలయాలను దర్శించాలంటే కొండలు ఎక్కాల్సి ఉంటుంది. ఇక్కడ గురు సంప్రదాయం ప్రకారం ప్రతిరోజూ పూజలు నిర్వహిస్తారు. ప్రతి గురువారం ప్రత్యేక పూజలు, అన్నదానం జరుగుతాయి. మార్గశిర మాసంలో దత్త జయంతి, ఆషాఢ మాసంలో గురుపూర్ణిమ సందర్భంగా విశేష పూజలు, దత్తహోమం నిర్వహించి మహాప్రసాదం పంపిణీ చేస్తారు. ఈ వేడుకలకు మహారాష్ట్రతో పాటు కర్ణాటక, తెలంగాణ, ఆంధ్రప్రదేశ్ నుంచి భక్తులు వస్తుంటారు. నాందేడ్, కిన్వత్, యావత్మల్ నుంచి మాహుర్‌కు బస్సు సౌకర్యం ఉంది. మాహుర్ పట్టణం నుంచి దత్తాత్రేయ స్వామి ఆలయం సుమారు ఏడు కిలోమీటర్ల దూరంలో ఉంది. సమీపంలోని ఏకవీరా దేవి ఆలయం, రేణుకాదేవి ఆలయం, అత్రి మహర్షి-అనసూయ దేవి ఆలయం, పరశురామ ఆలయం, మాహుర్ కోట, మాహుర్ తీర్థం కూడా దర్శించదగిన ప్రదేశాలు. గురుగ్రహం అనుగ్రహం కోసం దత్తాత్రేయ స్వామిని దర్శించుకోవడం శుభప్రదమని భక్తుల విశ్వాసం. ఈ వివరాలు సంప్రదాయ, ఆధ్యాత్మిక విశ్వాసాల ఆధారంగా ఉన్నాయని, వీటన్నింటికీ ఆధునిక శాస్త్రీయ ఆధారాలు ఉండకపోవచ్చని పాఠకులు గమనించాలి.