కొండచరియల ముప్పునకు చెక్‌.. అరుణాచలంలో మరమ్మతులు

ఫెంగల్‌ తుపాను ప్రభావంతో 2024 డిసెంబరు 1న తమిళనాడులోని తిరువణ్ణామలైలో భారీ కొండచరియలు విరిగిపడి విషాదం చోటుచేసుకుంది. కొండపై నుంచి భారీ బండరాళ్లు, మట్టి దిగువన ఉన్న ఇళ్లపైకి దూసుకురావడంతో ఒకే కుటుంబానికి చెందిన ఏడుగురు మృతి చెందారు. ఈ ఘటన నేపథ్యంలో తిరువణ్ణామలైలోని అన్నామలైయార్‌ కొండలపై కొండచరియల ముప్పును తగ్గించేందుకు ప్రభుత్వం ప్రత్యేక దృష్టి సారించింది.

కొండల పరిస్థితిని అంచనా వేసేందుకు నమూనాలను సేకరించి పరిశోధనలు చేపట్టడంతో పాటు డ్రోన్లు, ఉపగ్రహ చిత్రాల ద్వారా ప్రాంతాన్ని మ్యాపింగ్‌ చేశారు. భారీ వర్షాల సమయంలో కొండపై నుంచి ప్రవహించే నీరు, భూగర్భంలో చోటుచేసుకునే మార్పులు, కొండచరియలు విరిగిపడే ప్రమాద ప్రాంతాలను అధ్యయనం చేస్తున్నారు. గ్రీన్‌ తమిళనాడు మిషన్‌ ఆధ్వర్యంలో 962 హెక్టార్ల కొండ ప్రాంతాన్ని 16 సూక్ష్మ జలవిభజన ప్రాంతాలుగా విభజించి దశలవారీగా సంరక్షణ, నీటి ప్రవాహాల నిర్వహణ, పర్యావరణ పునరుద్ధరణ పనులు చేపట్టే ప్రణాళిక రూపొందించారు.