తెలంగాణలో ట్రాఫిక్ నియంత్రణకు కీలక సంస్కరణలు

తెలంగాణలో ట్రాఫిక్ నిర్వహణ, రోడ్డు భద్రతను మరింత బలోపేతం చేసేందుకు ప్రత్యేక ట్రాఫిక్, రోడ్, రైల్ సేఫ్టీ బ్యూరోను ఏర్పాటు చేయాలని ప్రభుత్వం నిర్ణయించింది. టీజీ టీఎంఏఆర్ఎస్ పేరుతో ఏర్పాటయ్యే ఈ ప్రత్యేక విభాగానికి ఏడీజీపీ లేదా ఐజీ స్థాయి అధికారిని డైరెక్టర్‌గా నియమించనున్నారు. ట్రాఫిక్ నిర్వహణ, అమలు చర్యలను ఈ బ్యూరో పర్యవేక్షించడంతో పాటు హైవేలు, ఎక్స్‌ప్రెస్‌వేలు, ఔటర్ రింగ్ రోడ్డుపై పెట్రోలింగ్ నిర్వహించనుంది. రోడ్డు ప్రమాదాలపై శాస్త్రీయ పద్ధతిలో దర్యాప్తు చేయడంతో పాటు మద్యం సేవించి వాహనాలు నడపడం, హెల్మెట్ నిబంధనల ఉల్లంఘన, అతివేగంపై ప్రత్యేక నిఘా పెట్టనుంది.

ప్రతి జిల్లాలో అదనపు ఎస్పీ స్థాయి ట్రాఫిక్ పోస్టును ఏర్పాటు చేయనున్నారు. ప్రస్తుతం ఉన్న ట్రాఫిక్ విభాగంలోని 300 పోస్టులను కొత్త బ్యూరోకు బదిలీ చేయనున్నారు. ట్రాఫిక్ సిబ్బందికి పర్యవేక్షణ, విధుల నిర్వహణలో ఉపయోగపడేలా శరీరానికి ధరించే కెమెరాలను ఏర్పాటు చేయనున్నారు. ట్రాఫిక్ సిబ్బందికి ప్రత్యేక శిక్షణ అందించేందుకు రాష్ట్ర ట్రాఫిక్ శిక్షణ అకాడమీని కూడా ఏర్పాటు చేయాలని ప్రభుత్వం నిర్ణయించింది.