కారు-ట్రాక్టర్‌ ఢీ.. తండ్రీకూతుళ్లు మృతి, తల్లీకుమారులకు తీవ్ర గాయాలు

సిద్దిపేట జిల్లా హుస్నాబాద్‌ మండలం పందిల్ల సమీపంలో సోమవారం మధ్యాహ్నం కారు, ట్రాక్టర్‌ ఎదురెదురుగా ఢీకొన్న ప్రమాదంలో తండ్రీకూతుళ్లు మృతి చెందారు. మరోవైపు తల్లీకుమారులు తీవ్రంగా గాయపడ్డారు. కరీంనగర్‌ జిల్లా చిగురుమామిడి మండలం కొండాపూర్‌కు చెందిన పైడిపల్లి శ్రీకాంత్‌ (35) హైదరాబాద్‌లో క్యాబ్‌ డ్రైవర్‌గా పనిచేస్తూ కుటుంబంతో అక్కడే నివసిస్తున్నారు. ఇటీవల స్వగ్రామంలో మరణించిన దగ్గరి బంధువు దశదిన కర్మకు హాజరయ్యేందుకు భార్య స్వాతి, కుమార్తె మహన్వి (9), కుమారుడు శ్రీహాన్‌ (6)తో కలిసి కారులో బయలుదేరారు. పందిల్ల దాటిన తర్వాత ఓ రైస్‌మిల్లులో ధాన్యం దించి వస్తున్న ట్రాక్టర్‌ ఎదురుగా రావడంతో రెండు వాహనాలు ఢీకొన్నాయి. సమాచారం అందుకున్న పోలీసులు స్థానికుల సహాయంతో కారులో చిక్కుకున్న నలుగురినీ బయటకు తీశారు. అప్పటికే శ్రీకాంత్‌, మహన్వి మృతి చెందారు. తీవ్రంగా గాయపడిన స్వాతి, శ్రీహాన్‌ను 108 అంబులెన్స్‌లో హుస్నాబాద్‌ ప్రభుత్వ ఆసుపత్రికి తరలించారు. ప్రథమ చికిత్స అనంతరం వారిని కరీంనగర్‌లోని ఆసుపత్రికి తీసుకెళ్లారు. స్వాతి పరిస్థితి విషమంగా ఉన్నట్లు తెలిసింది. ట్రాక్టర్‌ డ్రైవర్‌ మ్యాక గణేశ్‌ కూడా తీవ్రంగా గాయపడటంతో హుస్నాబాద్‌ ప్రభుత్వ ఆసుపత్రిలో చికిత్స పొందుతున్నారు.

ఈ ప్రమాదం శ్రీకాంత్‌ కుటుంబంలో తీవ్ర విషాదాన్ని నింపింది. ఆయన తల్లి సుగుణవ్వ, కొండాపూర్‌ వార్డు సభ్యురాలిగా పనిచేశారు. ఆర్నెల్ల కిందట కాశీయాత్రకు వెళ్లిన ఆమె.. వాతావరణ పరిస్థితులు అనుకూలించక అక్కడే మృతి చెందారు. ఇప్పుడు శ్రీకాంత్‌, ఆయన కుమార్తె కూడా రోడ్డు ప్రమాదంలో ప్రాణాలు కోల్పోవడంతో కుటుంబ సభ్యులు శోకసంద్రంలో మునిగిపోయారు. శ్రీకాంత్‌, స్వాతిది ప్రేమ వివాహం కాగా, ఇటీవల వారికి రెండో విడతలో ఇందిరమ్మ ఇల్లు మంజూరైంది. దశదిన కర్మకు హాజరైన తర్వాత ఇంటి సర్వే కోసం ఫొటో దిగాలని భావించినట్లు బంధువులు తెలిపారు. మృతదేహాలను చూసేందుకు హుస్నాబాద్‌ ప్రభుత్వ ఆసుపత్రికి పెద్ద సంఖ్యలో బంధువులు చేరుకున్నారు. ఈ ఘటనపై మంత్రి పొన్నం ప్రభాకర్‌ తీవ్ర దిగ్భ్రాంతి వ్యక్తం చేశారు. ఒకే కుటుంబానికి చెందిన ఇద్దరు మృతి చెందడం, మరో ఇద్దరు తీవ్రంగా గాయపడటం బాధాకరమన్నారు. గాయపడిన స్వాతికి మెరుగైన వైద్యం అందించాలని, బాధిత కుటుంబానికి అవసరమైన సహాయం చేయాలని అధికారులను ఆదేశించారు. శ్రీకాంత్‌ సోదరుడు సతీష్‌ ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై లక్ష్మారెడ్డి తెలిపారు.