

తమిళనాడులోని ప్రముఖ పుణ్యక్షేత్రాలను దర్శించుకోవాలనుకునే భక్తుల కోసం ఐఆర్సీటీసీ ‘అరుణాచలం మోక్ష యాత్ర’ పేరుతో ప్రత్యేక టూర్ ప్యాకేజీని అందిస్తోంది. నాలుగు రాత్రులు, ఐదు పగళ్లు సాగే ఈ యాత్రలో తిరువణ్ణామలైలోని అరుణాచలేశ్వర ఆలయం, కాంచీపురంలోని కామాక్షి అమ్మవారి ఆలయం, ఏకాంబరేశ్వర ఆలయంతో పాటు పుదుచ్చేరిలోని పర్యాటక ప్రాంతాలను సందర్శించవచ్చు. ప్రతి శుక్రవారం సాయంత్రం 5 గంటలకు కాచిగూడ నుంచి బయలుదేరే కాచిగూడ–పుదుచ్చేరి ఎక్స్ప్రెస్ (17653) ద్వారా యాత్ర ప్రారంభమవుతుంది. మరుసటి రోజు ఉదయం 11:05 గంటలకు పుదుచ్చేరి చేరుకున్న తర్వాత అరోవిల్, అరబిందో ఆశ్రమం, ప్యారడైజ్ బీచ్లను సందర్శిస్తారు. అనంతరం తిరువణ్ణామలై చేరుకొని అరుణాచలేశ్వరుడిని దర్శించుకుంటారు. అక్కడ మోక్షమార్గం సదుపాయాన్ని కూడా వినియోగించుకోవచ్చు. ఆ తర్వాత కాంచీపురంలోని ఆలయాలను దర్శించుకొని, అరక్కోణం నుంచి సాయంత్రం 6:05 గంటలకు 17651 నంబరు రైలులో తిరుగు ప్రయాణం ప్రారంభిస్తారు. మరుసటి రోజు ఉదయం 7:50 గంటలకు కాచిగూడ చేరుకోవడంతో యాత్ర ముగుస్తుంది. నవంబర్ 20 నుంచి డిసెంబర్ 18 వరకు ప్రయాణానికి టికెట్లు అందుబాటులో ఉన్నాయి.
ప్రయాణికుల సంఖ్య, గది షేరింగ్ విధానం, రైలు తరగతిని బట్టి ప్యాకేజీ ధరలు మారుతాయి. ఒకరి నుంచి ముగ్గురు బుక్ చేసుకుంటే కంఫర్ట్ (3 ఏసీ)లో ట్విన్ షేరింగ్కు ఒక్కొక్కరికి రూ.16,900, ట్రిపుల్ షేరింగ్కు రూ.13,210 చెల్లించాలి. స్టాండర్డ్ (స్లీపర్)లో ఈ ధరలు వరుసగా రూ.14,820, రూ.11,125గా ఉన్నాయి. నలుగురు నుంచి ఆరుగురు కలిసి బుక్ చేసుకుంటే కంఫర్ట్లో డబుల్ షేరింగ్కు రూ.13,900, ట్రిపుల్ షేరింగ్కు రూ.11,920; స్టాండర్డ్లో వరుసగా రూ.11,820, రూ.9,840 చెల్లించాలి. ప్యాకేజీలో రైలు ప్రయాణం, స్థానికంగా తిరిగేందుకు ఏసీ వాహనం, రెండు రోజుల వసతి, ఉదయం అల్పాహారం, ప్రయాణ బీమా సదుపాయాలు ఉంటాయి. పర్యాటక ప్రాంతాల్లో ప్రవేశ రుసుములు మాత్రం ప్రయాణికులే చెల్లించాలి. రద్దు ఛార్జీలు ఐఆర్సీటీసీ నిబంధనల ప్రకారం వర్తిస్తాయి. పూర్తి వివరాలు, హోటల్ సమాచారం, బుకింగ్ కోసం ఐఆర్సీటీసీ అధికారిక వెబ్సైట్ను సందర్శించవచ్చు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!