గిగ్‌ వర్కర్ల రక్షణకు ప్రత్యేక చట్టం.. ఇచ్చిన హామీని నిలబెట్టుకున్నాం: సీఎం రేవంత్‌రెడ్డి

తెలంగాణలో గిగ్‌ వర్కర్ల సంక్షేమం, రక్షణ కోసం ప్రత్యేక చట్టాన్ని తీసుకొచ్చి కాంగ్రెస్‌ ప్రభుత్వం ఇచ్చిన హామీని నిలబెట్టుకుందని ముఖ్యమంత్రి రేవంత్‌రెడ్డి అన్నారు. గిగ్‌ వర్కర్ల సభలో మాట్లాడుతూ, కొత్త చట్టం వారి హక్కులను కాపాడటంతో పాటు అన్ని విధాలుగా అండగా నిలుస్తుందని తెలిపారు. 2023లో కన్యాకుమారి నుంచి కశ్మీర్‌ వరకు సుమారు 4,000 కిలోమీటర్ల పాదయాత్ర చేసిన రాహుల్‌ గాంధీ పేదలు, కార్మికుల సమస్యలను స్వయంగా తెలుసుకున్నారని గుర్తుచేశారు. ఆ పాదయాత్రలో భాగంగా హైదరాబాద్‌కు వచ్చినప్పుడు గిగ్‌ వర్కర్లు రాహుల్‌ గాంధీని కలిసి తమ సమస్యలను వివరించారని చెప్పారు. తెలంగాణలో కాంగ్రెస్‌ ప్రభుత్వం అధికారంలోకి వస్తే గిగ్‌ వర్కర్ల రక్షణకు ప్రత్యేక చట్టం తీసుకొస్తామని రాహుల్‌ హామీ ఇచ్చారని, ఇప్పుడు దానిని అమలు చేశామని రేవంత్‌రెడ్డి పేర్కొన్నారు.

రాహుల్‌ గాంధీ చేతుల మీదుగా గిగ్‌ వర్కర్ల చట్టం అమల్లోకి రావడం సంతోషంగా ఉందని సీఎం అన్నారు. ఆయన ఇచ్చిన మాట తమకు మార్గదర్శకమని పేర్కొంటూ, గిగ్‌ వర్కర్ల తరఫున ప్రత్యేక ధన్యవాదాలు తెలిపారు. గిగ్‌ వర్కర్లకు లక్షల రూపాయల ప్రమాద బీమా కల్పించామని, ఆరోగ్యశ్రీ పరిమితిని రూ.10 లక్షలకు పెంచామని వివరించారు. వారి సంక్షేమం కోసం ప్రత్యేక బోర్డును కూడా ఏర్పాటు చేసినట్లు చెప్పారు. కొత్త చట్టం గిగ్‌ వర్కర్ల హక్కులు, భద్రతకు రక్షణ కల్పిస్తుందని, వారి సంక్షేమ బాధ్యతను ప్రభుత్వం తీసుకుంటుందని రేవంత్‌రెడ్డి భరోసా ఇచ్చారు.