సముద్ర దొంగలపై భారత నేవీ, ఎయిర్‌ఫోర్స్ మెరుపు దాడి..

భారత నౌకాదళం, వైమానిక దళం సంయుక్తంగా అరేబియా సముద్రంలో సాహసోపేత ఆపరేషన్ నిర్వహించాయి. సోమాలియా సముద్ర దొంగలు హైజాక్ చేసిన ఇరాన్‌కు చెందిన మత్స్యకారుల పడవ ‘అజిని’ని సురక్షితంగా విడిపించాయి. అక్టోబర్ 29న 20 మంది సిబ్బందితో ప్రయాణిస్తున్న ఈ పడవను సముద్ర దొంగలు అపహరించారు. సమాచారం అందుకున్న భారత నేవీ రంగంలోకి దిగి, ముంబయికి సుమారు 3 వేల కిలోమీటర్ల దూరంలో ఉన్న పడవను గుర్తించి అడ్డుకుంది. 48 గంటలపాటు పక్కా ప్రణాళికతో ఆపరేషన్ చేపట్టింది. భారత వైమానిక దళం అందించిన సహకారంతో సముద్ర దొంగలను ఎదుర్కొని పడవను తమ ఆధీనంలోకి తీసుకుంది. నవంబర్ 2న ఆపరేషన్ విజయవంతంగా ముగిసింది. ఈ ఘటనలో ఎలాంటి ప్రాణనష్టం జరగకుండా మొత్తం 20 మంది సిబ్బందిని సురక్షితంగా రక్షించారు.

ఈ విజయవంతమైన ఆపరేషన్‌పై రక్షణశాఖ మంత్రి రాజ్‌నాథ్ సింగ్ హర్షం వ్యక్తం చేశారు. 48 గంటలపాటు కొనసాగిన ఆపరేషన్‌లో భారత నౌకాదళం అద్భుతమైన సమన్వయంతో పనిచేసిందని, వైమానిక దళం సకాలంలో అందించిన సహకారం కీలకంగా నిలిచిందని ఎక్స్ వేదికగా పేర్కొన్నారు. సముద్రంలో ఎదురయ్యే ముప్పులను సమర్థంగా ఎదుర్కొనే సామర్థ్యం భారత నేవీకి ఉందని ఈ ఆపరేషన్ మరోసారి నిరూపించిందన్నారు. హిందూ మహాసముద్ర ప్రాంతంలో భద్రతను కాపాడేందుకు భారత్ తన వంతు కృషిని కొనసాగిస్తుందని స్పష్టం చేశారు. ఇటీవలి కాలంలో హిందూ మహాసముద్రం, గల్ఫ్ ఆఫ్ ఏడెన్ పరిసరాల్లో సముద్ర దొంగల కార్యకలాపాలు పెరుగుతున్న నేపథ్యంలో భారత నౌకాదళం నిరంతర నిఘా కొనసాగిస్తూ అంతర్జాతీయ నౌకలకు భద్రత కల్పిస్తోంది.