వికసిత్ భారత్ నిర్మాణంలో ప్రతి ఒక్కరూ భాగస్వాములు కావాలి: గవర్నర్

వికసిత్‌, ఆరోగ్యకరమైన, ఆత్మనిర్భరమైన భారత నిర్మాణంలో ప్రతి ఒక్కరూ భాగస్వాములు కావాలని తెలంగాణ గవర్నర్‌ శివ ప్రతాప్‌ శుక్లా పిలుపునిచ్చారు. హైదరాబాద్‌లోని లోక్‌భవన్‌లో ఆగస్టు 15, 2026న 80వ స్వాతంత్య్ర దినోత్సవ వేడుకలు ఘనంగా నిర్వహించారు. పోలీసుల గౌరవ వందనం స్వీకరించిన అనంతరం గవర్నర్‌ జాతీయ పతాకాన్ని ఆవిష్కరించారు. అనంతరం తెలంగాణ ప్రజలకు, దేశ ప్రజలకు స్వాతంత్య్ర దినోత్సవ శుభాకాంక్షలు తెలిపారు.

స్వాతంత్య్రం కోసం ప్రాణత్యాగం చేసిన సమరయోధులు, జాతీయ నాయకుల త్యాగాలను గవర్నర్‌ ఈ సందర్భంగా స్మరించుకున్నారు. వారి ధైర్యం, త్యాగం, దేశభక్తి నుంచి స్ఫూర్తి పొందాలని ప్రజలను కోరారు. భిన్నత్వంలో ఏకత్వమే భారతదేశానికి బలమని పేర్కొన్నారు. ప్రపంచంలోనే అతిపెద్ద ప్రజాస్వామ్య దేశంగా భారత్‌ కొనసాగుతూ, మూడో అతిపెద్ద ఆర్థిక వ్యవస్థగా ఎదిగే దిశగా వేగంగా ముందుకు సాగుతోందని తెలిపారు. వికసిత్‌ భారత్‌ లక్ష్యాన్ని సాధించేందుకు ప్రతి ఒక్కరూ తమ వంతు కృషి చేయాలని సూచించారు.

దేశ అభివృద్ధి ప్రస్థానంలో తెలంగాణ కీలకమైన గ్రోత్‌ ఇంజిన్‌గా ఎదుగుతోందని శివ ప్రతాప్‌ శుక్లా అన్నారు. హైదరాబాద్‌ దేశంలోని ప్రముఖ వృద్ధి కేంద్రాల్లో ఒకటిగా ప్రత్యేక గుర్తింపు సాధించిందని పేర్కొన్నారు. సాగునీటి ప్రాజెక్టుల ద్వారా వ్యవసాయ రంగంలో మార్పులతో పాటు ఐటీ, కృత్రిమ మేధస్సు, ఫార్మాస్యూటికల్స్‌, బయోటెక్నాలజీ రంగాల్లో తెలంగాణ వేగంగా అభివృద్ధి చెందుతోందన్నారు. ఆవిష్కరణలు, సాంకేతికత, అభివృద్ధిలో రాష్ట్రం ప్రపంచస్థాయి కేంద్రంగా ఎదిగే సామర్థ్యం కలిగి ఉందని చెప్పారు.

ఆర్థిక, సాంకేతిక అభివృద్ధితో పాటు ప్రజారోగ్యం, యువత సాధికారతకు కూడా ప్రాధాన్యం ఇవ్వాలని గవర్నర్‌ సూచించారు. టీబీ ముక్త్‌ భారత్‌, నశా ముక్త్‌ భారత్‌ వంటి కార్యక్రమాలను తెలంగాణలో విస్తృత ప్రజా ఉద్యమాలుగా తీర్చిదిద్దాలని అన్నారు. టీబీ నిర్మూలనతో పాటు యువతను మాదకద్రవ్యాల బారిన పడకుండా కాపాడేందుకు ప్రజలు, సంస్థలు, యువత పెద్దఎత్తున భాగస్వాములు కావాలని పిలుపునిచ్చారు.

దేశ సరిహద్దుల్లో విధులు నిర్వహిస్తున్న సాయుధ దళాలు, భద్రతా బలగాల త్యాగాలను గవర్నర్‌ కొనియాడారు. వారి అప్రమత్తత, ధైర్యం, త్యాగాల వల్లే దేశం అభివృద్ధి పథంలో నిర్భయంగా ముందుకు సాగుతోందని అన్నారు. త్రివర్ణ పతాకం సాక్షిగా ఆరోగ్యకరమైన, ఆత్మనిర్భరమైన, సమృద్ధమైన తెలంగాణ నిర్మాణానికి ప్రతి ఒక్కరూ అంకితభావంతో కృషి చేయాలని కోరారు.