భద్రాచలం వద్ద పెరుగుతున్న గోదావరి

ఎగువ ప్రాంతాల్లో కురుస్తున్న వర్షాలతో భద్రాచలం వద్ద గోదావరి వరద ప్రవాహం క్రమంగా పెరుగుతోంది. ఆదివారం రాత్రి 7 గంటలకు నది నీటిమట్టం 42.8 అడుగులకు చేరుకుంది. ఇంద్రావతి వైపు నుంచి వస్తున్న వరద నీటితో పాటు పరివాహక ప్రాంతాల్లో కురుస్తున్న వర్షాల కారణంగా గోదావరి నీటిమట్టం మరింత పెరుగుతున్నట్లు అధికారులు తెలిపారు. దీంతో లోతట్టు ప్రాంతాల్లో పనిచేస్తున్న సిబ్బందిని అధికారులు అప్రమత్తం చేశారు.

వరద పరిస్థితుల నేపథ్యంలో భద్రాచలం రామాలయంలో భక్తులు తలనీలాలు సమర్పించే కల్యాణ కట్టను నది ఒడ్డు నుంచి తరలించి కరకట్ట సమీపంలో తాత్కాలికంగా ఏర్పాటు చేశారు. వరద ఉద్ధృతి దృష్ట్యా ప్రధాన ఘాట్‌లో స్నానాలకు అనుమతిని నిలిపివేశారు. భక్తుల భద్రతను దృష్టిలో ఉంచుకుని పోలీసులు బందోబస్తు చర్యలు చేపట్టారు. పరిస్థితిని అధికారులు ఎప్పటికప్పుడు పర్యవేక్షిస్తున్నారు.