అమరావతికి జాతీయ రహదారితో తొలి అనుసంధానం

రాజధాని అమరావతిని ఎన్‌హెచ్‌-16తో అనుసంధానించే తొలి రహదారిగా ఈ-13 ఎక్స్‌టెన్షన్‌ రోడ్డు నిలవనుంది. అమరావతి మాస్టర్‌ ప్లాన్‌లో జాతీయ రహదారిని రాజధానితో కలిపేందుకు రెండు ‘ఈ’ సిరీస్‌ రోడ్లను ప్రతిపాదించారు. సీడ్‌ యాక్సిస్‌ రోడ్డు ఫేజ్‌-3 పనులు ప్రారంభమైతేనే ఎన్‌హెచ్‌-16తో అనుసంధానం సాధ్యమవుతుంది. అయితే ఈ-13 రోడ్డు పనులు ఇప్పటికే ప్రారంభమై గణనీయంగా ముందుకు సాగుతున్నాయి. మొత్తం 10.45 కి.మీ. పొడవైన ఈ ప్రాజెక్టును రెండు దశల్లో నిర్మిస్తున్నారు. మొదటి దశలో నెక్కల్లు, అనంతవరం నుంచి యర్రబాలెం వరకు 7.3 కి.మీ. రహదారిని రూ.208 కోట్లతో నిర్మిస్తున్నారు.

3.43 కి.మీ. పొడవైన ఈ-13 ఎక్స్‌టెన్షన్‌ రెండో దశ అత్యంత సంక్లిష్టమైన భాగంగా ఉంది. దీని నిర్మాణానికి రూ.400 కోట్లకు పైగా ఖర్చవుతుండగా, కేంద్రం రూ.274 కోట్ల అంచనా వ్యయంతో 609 మీటర్ల పొడవైన ఆర్వోబీని నిర్మిస్తోంది. యర్రబాలెం నుంచి డాన్‌బాస్కో స్కూల్‌, విజయవాడ-గుంటూరు రైల్వే ట్రాక్‌, డోలాస్‌ నగర్‌ కొండలు, ఎయిమ్స్‌, డీజీపీ కార్యాలయం మీదుగా ఈ రహదారి ఎన్‌హెచ్‌-16ను కలుస్తుంది. 60 మీటర్ల వెడల్పుతో ఆరు లేన్లుగా నిర్మించే ఈ రోడ్డులో రెండు కొండలను తొలచే పనులతో పాటు భారీ ఎలివేటెడ్‌ కారిడార్‌ కూడా ఉంటుంది. ఆర్వోబీ నిర్మాణానికి అవసరమైన 3.34 ఎకరాల ఎయిమ్స్‌ భూమికి సంబంధించిన సమస్య కూడా గత నెల పరిష్కారమై నిర్మాణానికి అడ్డంకులు తొలగిపోయాయి.