బెంగాల్, తమిళనాడు ఫలితాలపై ఫరూక్ అబ్దుల్లా ఆసక్తికర వ్యాఖ్యలు

దేశంలోని ఐదు రాష్ట్రాల అసెంబ్లీ ఎన్నికల ప్రక్రియ తుది దశకు చేరుతున్న వేళ జమ్మూ కశ్మీర్ మాజీ ముఖ్యమంత్రి ఫరూక్ అబ్దుల్లా కీలక వ్యాఖ్యలు చేశారు. అసెంబ్లీ ఎన్నికలు జరుగుతున్న ముఖ్య రాష్ట్రాల్లో ఇండియా కూటమి పక్షాలే అధికారంలోకి వస్తాయని ఆయన విశ్వాసం వ్యక్తం చేశారు. హజ్రత్బల్ లో మీడియాతో మాట్లాడిన ఆయన, పశ్చిమ బెంగాల్‌లో మమతా బెనర్జీ విజయం సాధిస్తారని, కేరళలో కాంగ్రెస్, తమిళనాడులో స్టాలిన్ నేతృత్వంలోని ద్రావిడ పార్టీ గెలుస్తుందని తెలిపారు.

మధ్య ప్రాచ్యంలో నెలకొన్న యుద్ధ పరిస్థితులపై స్పందిస్తూ శాంతి పునరుద్ధరణ అత్యవసరమని ఆయన అన్నారు. ఈ యుద్ధం త్వరగా ముగియకపోతే ప్రపంచానికి తీవ్రమైన పరిణామాలు ఎదురవుతాయని హెచ్చరించారు. అందువల్ల ప్రతి దేశం, ప్రతి నాయకుడు ఈ యుద్ధం ముగిసేలా కృషి చేయాలని ఆయన విజ్ఞప్తి చేశారు.

అమెరికాను యుద్ధం వైపు నెట్టేందుకు ఇజ్రాయెల్ వ్యవహరించిన తీరు సరైనది కాదని అమెరికా అధ్యక్షుడు డొనాల్డ్ ట్రంప్ గ్రహించారని ఆయన అభిప్రాయపడ్డారు. చైనా, రష్యా దేశాలు కూడా ఈ యుద్ధం త్వరగా ముగిసేలా చర్యలు తీసుకుంటాయని ఆశాభావం వ్యక్తం చేశారు. మాదకద్రవ్యాల నిర్మూలనకు కేంద్రం చేపట్టిన కార్యక్రమం విజయవంతం కావాలంటే ప్రజల మద్దతు అత్యంత అవసరమని ఆయన పేర్కొన్నారు.