అర్నబ్‌ తుపాను ప్రభావం.. హైదరాబాద్‌ నుంచి వెళ్లే పలు రైళ్లు రద్దు

అర్నబ్‌ తుపాను నేపథ్యంలో దక్షిణ మధ్య రైల్వే పలు రైళ్లను రద్దు చేసింది. అక్టోబర్‌ 27న హైదరాబాద్‌, సికింద్రాబాద్‌, లింగంపల్లి నుంచి బయల్దేరాల్సిన గోదావరి, ఫలక్‌నుమా, గరీబ్‌రథ్‌, విశాఖ, నర్సాపూర్‌ ఎక్స్‌ప్రెస్‌లతో పాటు మరికొన్ని రైళ్లను రద్దు చేసినట్లు దక్షిణ మధ్య రైల్వే ముఖ్య ప్రజాసంబంధాల అధికారి (సీపీఆర్వో) ఒక ప్రకటనలో తెలిపారు. తుపాను పరిస్థితుల నేపథ్యంలో ఈ నిర్ణయం తీసుకున్నట్లు వెల్లడించారు.

నాగర్‌సోల్‌–నర్సాపూర్‌ ఎక్స్‌ప్రెస్‌ను పాక్షికంగా రద్దు చేసినట్లు రైల్వే అధికారులు పేర్కొన్నారు. అలాగే, అక్టోబర్‌ 28న శ్రీకాకుళం రోడ్డు నుంచి చర్లపల్లికి రావాల్సిన రైలును కూడా రద్దు చేశారు. ప్రయాణానికి ప్రణాళికలు వేసుకున్న ప్రయాణికులు బయల్దేరే ముందు రైళ్ల తాజా స్థితిని అధికారిక రైల్వే సమాచార వ్యవస్థలో తనిఖీ చేసుకోవాలని సూచించారు.