వరి విత్తనాల విక్రయంపై కీలక ప్రకటన

వరి విత్తనాల కొనుగోలుకు రైతుల నుంచి స్వయం అంగీకార పత్రం (సెల్ఫ్ డిక్లరేషన్) తీసుకున్న తర్వాతే విక్రయించాలని విత్తన డీలర్లకు ఆదేశాలు జారీ చేసినట్లు వస్తున్న వార్తల్లో వాస్తవం లేదని తెలంగాణ వ్యవసాయ శాఖ స్పష్టం చేసింది. అక్టోబర్ 27న సాక్షి దినపత్రికలో ప్రచురితమైన కథనం వాస్తవాలకు విరుద్ధంగా ఉందని, రైతులను అయోమయానికి గురిచేసే అవకాశం ఉందని పేర్కొంది. సెల్ఫ్ డిక్లరేషన్ తీసుకోవాలని డీలర్లకు ఎలాంటి ఉత్తర్వులు లేదా సూచనలు జారీ చేయలేదని వ్యవసాయ శాఖ డైరెక్టర్ డా. బి. గోపీ తెలిపారు.

ఎల్ నినో ప్రభావంతో వర్షపాతం తగ్గే అవకాశం ఉన్నందున, యాసంగి సాగులో నీటి లభ్యత, భూగర్భ జలమట్టాలు, విద్యుత్ డిమాండ్‌ను పరిగణనలోకి తీసుకుని తక్కువ నీటితో పండే, స్వల్పకాలిక ప్రత్యామ్నాయ పంటలను సాగు చేయాలని వ్యవసాయ శాఖ రైతులకు సూచించింది. పప్పుధాన్యాలు, చిరుధాన్యాలు, నూనెగింజలు, కూరగాయల విత్తనాలను తగినంతగా అందుబాటులో ఉంచాలని అధికారులను ఆదేశించింది. విత్తనాల కొనుగోలుపై రైతులు ఆందోళన చెందాల్సిన అవసరం లేదని తెలిపింది. డీలర్లు సెల్ఫ్ డిక్లరేషన్ కోసం ఒత్తిడి చేసినా, నాణ్యత లేని విత్తనాలు విక్రయించినా సంబంధిత మండల లేదా జిల్లా వ్యవసాయ అధికారులకు ఫిర్యాదు చేయాలని సూచించింది. నిబంధనలు ఉల్లంఘించే డీలర్లపై విత్తన చట్టం ప్రకారం కఠిన చర్యలు తీసుకుంటామని హెచ్చరించింది. అధికారిక సమాచారాన్ని మాత్రమే విశ్వసించాలని రైతులను కోరింది.