మచిలీపట్నంలో తుఫాను అలర్ట్..

తుఫాను ప్రభావంతో కృష్ణా జిల్లా మచిలీపట్నంలో వాతావరణం ఒక్కసారిగా మారిపోయింది. ఉదయం ఎండ వేడిమి ఉన్నప్పటికీ, అనంతరం ఆకాశం మేఘావృతమై చల్లటి వాతావరణం ఏర్పడింది. తుఫాను ప్రభావం తీవ్రతరం కావచ్చన్న వాతావరణ శాఖ హెచ్చరికల నేపథ్యంలో జిల్లా యంత్రాంగం అప్రమత్తమైంది. మచిలీపట్నంలో సాయంత్రం 4 గంటల నుంచి కిరాణా దుకాణాలు, ఇతర వ్యాపార సంస్థలను మూసివేయాలని జిల్లా కలెక్టర్ బాలాజీ సూచించారు. ప్రజలు సురక్షితమైన భవనాల్లో ఉండాలని, అత్యవసర పరిస్థితులు మినహా బయటకు రావద్దని అధికారులు విజ్ఞప్తి చేశారు.

తీరప్రాంతాల్లో మత్స్యకారులు సముద్రంలో చేపల వేటకు వెళ్లవద్దని అధికారులు మైకుల ద్వారా హెచ్చరికలు జారీ చేస్తున్నారు. అవసరమైన ప్రాంతాల్లో పునరావాస కేంద్రాలు ఏర్పాటు చేయాలని, రెవెన్యూ, మున్సిపల్, పోలీస్, అగ్నిమాపక శాఖలు సమన్వయంతో పనిచేస్తూ అత్యవసర పరిస్థితులను ఎదుర్కొనేందుకు సిద్ధంగా ఉండాలని ఆదేశించారు. తుఫాను నేపథ్యంలో మంగినపూడి బీచ్ పరిసర ప్రాంతాల్లోకి పర్యాటకులు, సందర్శకులు వెళ్లకుండా పోలీసులు రహదారులను మూసివేశారు. సముద్ర తీరం వెంబడి నిరంతరం పహారా నిర్వహిస్తున్నారు. ప్రజలు అధికారుల సూచనలు పాటిస్తూ అప్రమత్తంగా ఉండాలని, తమ ప్రాణ భద్రతకు ప్రాధాన్యం ఇవ్వాలని అధికారులు సూచించారు.