తమిళనాడులో ‘బ్రేకింగ్ బ్యాడ్’ తర్వాత ‘ప్రిజన్ బ్రేక్’.. విజయ్ ప్రభుత్వంపై స్టాలిన్ ఫైర్

తమిళనాడులో జోసెఫ్ విజయ్ నేతృత్వంలోని ప్రభుత్వంపై మాజీ ముఖ్యమంత్రి, డీఎంకే అధినేత ఎంకే స్టాలిన్ విమర్శలు గుప్పించారు. రాష్ట్రంలో చోటుచేసుకుంటున్న వరుస ఘటనలను ప్రస్తావిస్తూ, ప్రముఖ వెబ్‌సిరీస్‌ల పేర్లతో ప్రభుత్వంపై వ్యంగ్యాస్త్రాలు సంధించారు. ఇటీవల రూ.100 కోట్ల విలువైన 135 కిలోల డ్రగ్స్ అక్రమ రవాణా కేసులో తమిళగ వెట్రి కళగం (టీవీకే)కు చెందిన ఓ నేత అరెస్టైన ఘటనను ప్రస్తావిస్తూ ‘బ్రేకింగ్ బ్యాడ్’ వ్యాఖ్యలు చేసిన స్టాలిన్.. తాజాగా తేని జైలు నుంచి ఖైదీలు తప్పించుకున్న ఘటనపై ‘ప్రిజన్ బ్రేక్’ అంటూ విమర్శించారు. బెయిల్‌పై బయట ఉన్న నేరస్థులపై పర్యవేక్షణ చేయడంలోనే ప్రభుత్వం విఫలమైందని భావించానని, ఇప్పుడు జైళ్లలోని ఖైదీలు తప్పించుకుంటున్నా అడ్డుకోలేని పరిస్థితి కనిపిస్తోందని ఆయన ఎద్దేవా చేశారు.

ఇప్పటికే పుళల్ జైలు నుంచి ఇద్దరు ఖైదీలు తప్పించుకున్న ఘటన మరువకముందే, తేని జైలు నుంచి 17 మంది ఖైదీలు పారిపోయారని స్టాలిన్ పేర్కొన్నారు. 1995 తర్వాత ఒకేసారి ఇంతమంది ఖైదీలు తప్పించుకోవడం ఇదే తొలిసారని ఆయన అన్నారు. భద్రతా ఏర్పాట్లు, ఆధునిక సాంకేతిక పరిజ్ఞానం అందుబాటులో ఉన్నప్పటికీ ఇలాంటి ఘటనలు జరగడం ఆందోళనకరమని విమర్శించారు. బయట నేరస్థులు స్వేచ్ఛగా తిరుగుతుంటే, జైళ్లలోని ఖైదీలు సైతం తప్పించుకుంటున్నారని వ్యాఖ్యానించారు. ప్రజలకు భద్రత కల్పించడంలో ప్రభుత్వం విఫలమైందని ఆరోపిస్తూ, ప్రజలే తమను తాము రక్షించుకోవాల్సిన పరిస్థితి ఏర్పడిందని స్టాలిన్ విమర్శించారు.