తెలంగాణ చరిత్రలో అందెశ్రీ రచనలు చిరస్థాయిగా నిలుస్తాయి: మంత్రి జూపల్లి

ప్రజాకవి అందెశ్రీ సేవలు, రచనలు, పాటలు తెలంగాణ చరిత్రలో చిరస్థాయిగా నిలిచిపోతాయని పర్యాటక, సాంస్కృతిక, ఎక్సైజ్ శాఖ మంత్రి జూపల్లి కృష్ణారావు అన్నారు. అందెశ్రీ వర్ధంతి సందర్భంగా మంగళవారం హైదరాబాద్‌లోని రవీంద్రభారతిలో నిర్వహించిన కార్యక్రమంలో పాల్గొన్న మంత్రి.. ఆయన చిత్రపటానికి పుష్పాంజలి ఘటించి నివాళులర్పించారు. తెలంగాణ ప్రత్యేక రాష్ట్ర ఉద్యమ సమయంలో తన కలం, గళం ద్వారా ప్రజల్లో చైతన్యం నింపిన అందెశ్రీ సేవలను కొనియాడారు. ‘జయ జయహే తెలంగాణ’ గేయం ఉద్యమ సమయంలో కోట్లాది మంది ప్రజల గొంతుకగా నిలిచిందని, తెలంగాణ సమాజాన్ని ఏకతాటిపైకి తీసుకురావడంలో ఆయన పాటలు కీలక పాత్ర పోషించాయని గుర్తుచేశారు.

కవులు, సాహితీవేత్తల గొప్పతనాన్ని వారు రచించిన పుస్తకాల సంఖ్యతో కాకుండా, సమాజంపై వారి రచనలు చూపిన ప్రభావంతో అంచనా వేయాలని జూపల్లి అభిప్రాయపడ్డారు. ఆ కోణంలో అందెశ్రీ అత్యున్నత ప్రజాకవిగా నిలిచిపోతారని పేర్కొన్నారు. ఆయన ఆశయాలు, ఆలోచనా విధానాన్ని కవులు, కళాకారులు, సాహితీవేత్తలు ముందుకు తీసుకెళ్లాలని పిలుపునిచ్చారు. తెలంగాణ ప్రజలు ఆత్మగౌరవంతో జీవించాలన్న అందెశ్రీ ఆకాంక్షలను మన ఆలోచనలు, ఆచరణలో భాగం చేసుకున్నప్పుడే ఆయనకు నిజమైన నివాళి అర్పించినట్లవుతుందని మంత్రి అన్నారు. ఈ కార్యక్రమంలో అరుణోదయ విమలక్క, తెలంగాణ సాంస్కృతిక సారథి చైర్‌పర్సన్ వెన్నెల గద్దర్, పశుగణాభివృద్ధి సంస్థ చైర్మన్ చరణ్ కౌశిక్ యాదవ్, భాషా సాంస్కృతిక శాఖ డైరెక్టర్ నర్సింహారెడ్డి తదితరులు పాల్గొన్నారు.