ఐపీఎల్‌ నిర్వహణపై జూహీ చావ్లా కీలక సూచన..

ఇండియన్‌ ప్రీమియర్‌ లీగ్‌ (ఐపీఎల్‌) నిర్వహణ సమయాన్ని మార్చాలని నటి, కోల్‌కతా నైట్‌ రైడర్స్‌ సహ యజమాని జూహీ చావ్లా సూచించారు. ప్రస్తుతం ఏప్రిల్‌, మే నెలల్లో జరుగుతున్న ఈ మెగా టోర్నీని జనవరిలో నిర్వహించే అంశాన్ని పరిశీలించాలని ఆమె అభిప్రాయపడ్డారు. క్రికెట్‌ క్యాలెండర్‌లో ఐపీఎల్‌ తన స్థానాన్ని నిరూపించుకోవాల్సిన అవసరం లేదని, ఇప్పటికే ప్రపంచంలోని అతిపెద్ద క్రికెట్‌ టోర్నీల్లో ఒకటిగా ఎదిగిందని పేర్కొన్నారు. ఇంతటి భారీ టోర్నీని తీవ్రమైన ఎండాకాలంలోనే ఎందుకు నిర్వహించాలనే ప్రశ్నను ఆమె లేవనెత్తారు.

జనవరిలో టోర్నీ నిర్వహిస్తే మెరుగైన వాతావరణ పరిస్థితుల్లో మ్యాచ్‌లు జరిగే అవకాశం ఉంటుందని జూహీ చావ్లా అభిప్రాయపడ్డారు. దీనివల్ల ఆటగాళ్ల ప్రదర్శన మెరుగుపడటంతో పాటు అభిమానులకు కూడా మరింత సౌకర్యవంతమైన క్రికెట్‌ అనుభవం లభిస్తుందని పేర్కొన్నారు. ఐపీఎల్‌ విస్తృతి, ప్రాధాన్యత పెరిగిన నేపథ్యంలో దాని నిర్వహణ క్యాలెండర్‌లోనూ మార్పులు రావాల్సిన అవసరం ఉందని ఆమె తన సోషల్‌ మీడియా పోస్టులో వెల్లడించారు. అయితే, ఈ ప్రతిపాదన అమలుకు అంతర్జాతీయ క్రికెట్‌ షెడ్యూల్‌, ఆటగాళ్ల అందుబాటు, ఇతర టోర్నీల తేదీలను కూడా పరిగణనలోకి తీసుకోవాల్సి ఉంటుంది.