ఎస్‌ఐఆర్‌పై ఆరోహి రెడ్డి కీలక ప్రశ్నలు

స్పెషల్ ఇంటెన్సివ్ రివిజన్‌ (ఎస్‌ఐఆర్‌)లో బీజేపీకి ప్రయోజనం చేకూర్చేలా ఓటర్ల పేర్లను తొలగిస్తున్నారన్న వాదనపై సోషల్ మీడియా వ్యాఖ్యాత ఆరోహి రెడ్డి ప్రశ్నలు సంధించారు. ఎక్స్‌లో చేసిన పోస్టులో ఓటర్ల పేర్లు తొలగించే సమయంలో వారు ఏ పార్టీకి మద్దతు ఇస్తారో ఎన్నికల అధికారులు ఎలా తెలుసుకోగలరని ఆమె ప్రశ్నించారు. తొలగింపునకు గురైన ఓటర్లు కాంగ్రెస్‌కు మద్దతు ఇస్తారా, బీజేపీని వ్యతిరేకిస్తారా అనే విషయాన్ని అధికారులు ఏ ఆధారంతో నిర్ధారిస్తారో స్పష్టత లేదని పేర్కొన్నారు. ఓటర్ల పేర్ల తొలగింపుతో వారి రాజకీయ అభిప్రాయాలను అంచనా వేయలేమన్నది ఆమె అభిప్రాయంగా తెలుస్తోంది.

మరోవైపు ఎస్‌ఐఆర్‌ ప్రక్రియపై ఇప్పటికే పలు ప్రశ్నలు, విమర్శలు వ్యక్తమవుతున్నాయి. ఓటర్ల నమోదు, పేర్ల తొలగింపు, పునరుద్ధరణ, ఫారం 6లో మార్పులు, ఓటర్ల జాబితా సమాచార వ్యవస్థకు సంబంధించిన అంశాలపై ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి పలుమార్లు అభ్యంతరాలు వ్యక్తం చేసినట్లు ఇండియన్‌ ఎక్స్‌ప్రెస్‌ నివేదిక పేర్కొంది. అయితే ఎన్నికల కమిషన్‌ మాత్రం ఇలాంటి సూచనలు, అభిప్రాయ భేదాలు నిర్ణయ ప్రక్రియలో సాధారణమేనని, ఎస్‌ఐఆర్‌తో సహా తుది నిర్ణయాలన్నీ ఏకగ్రీవంగానే తీసుకున్నామని స్పష్టం చేసింది.