ఈసారి పండుగ షాపింగ్‌ ఎలా ఉండబోతోందంటే?

పండుగ సీజన్‌ సమీపిస్తున్న వేళ దేశంలో ఎలక్ట్రానిక్స్‌, గృహోపకరణాల కొనుగోళ్లపై ఆసక్తి పెరుగుతోంది. అయితే స్మార్ట్‌ఫోన్లు, టీవీలు, ఇతర కన్జూమర్‌ డ్యూరబుల్స్‌ ధరలు గణనీయంగా పెరగడం పరిశ్రమకు సవాలుగా మారింది. అయినప్పటికీ డిస్కౌంట్లు, సులభమైన ఈఎంఐ సదుపాయాలు, ఎక్స్ఛేంజ్‌ ఆఫర్లు, ప్రీమియం ఉత్పత్తులపై వినియోగదారుల ఆసక్తి కారణంగా ఈ పండుగ సీజన్‌లో విక్రయాలు పెరుగుతాయని రిటైలర్లు ఆశిస్తున్నారు. గతేడాదితో పోలిస్తే ఈసారి 8–10 శాతం వృద్ధి సాధ్యమని విజయ్‌ సేల్స్‌ అంచనా వేస్తోంది. ముఖ్యంగా ఏఐ ఫీచర్లతో కూడిన టీవీలు, ల్యాప్‌టాప్‌లు, పెద్ద స్క్రీన్‌ టీవీలు, రోబోటిక్‌ వాక్యూమ్‌లు, కాఫీ మెషీన్లు వంటి ప్రీమియం ఉత్పత్తులకు డిమాండ్‌ పెరుగుతోంది.

అయితే పెరిగిన ధరలు మధ్యతరగతి, ఎంట్రీ లెవల్‌ వినియోగదారుల కొనుగోళ్లను ప్రభావితం చేసే అవకాశం ఉంది. 2026 రెండో త్రైమాసికంలో భారత్‌లో స్మార్ట్‌ఫోన్ల సగటు విక్రయ ధర 14.4 శాతం పెరిగి రికార్డు స్థాయికి చేరినట్లు పరిశ్రమ గణాంకాలు సూచిస్తున్నాయి. టీవీలు, గృహోపకరణాల ధరలు కూడా పెరగడంతో టైర్‌-2, చిన్న పట్టణాల్లో కొందరు వినియోగదారులు కొనుగోళ్లను వాయిదా వేసుకునే అవకాశం ఉంది. మరోవైపు ఈ ఏడాది దీపావళి నవంబర్‌లో రావడంతో సెప్టెంబర్‌ నుంచి నవంబర్‌ వరకు సుదీర్ఘ సేల్స్‌ సీజన్‌ లభించనుంది. పెరిగిన రాగి, అల్యూమినియం ధరలు తయారీ సంస్థలపై ఒత్తిడి పెంచుతున్నప్పటికీ, డిస్కౌంట్లు, ఈఎంఐలు, కొత్త ఏఐ ఫీచర్లు, ప్రీమియం ఉత్పత్తులు అమ్మకాలకు ఊతమిస్తాయని పరిశ్రమ భావిస్తోంది.