టాటా గ్రూప్‌లో మళ్లీ తెరపైకి బోర్డురూమ్‌ వార్

టాటా గ్రూప్‌ హోల్డింగ్‌ కంపెనీ టాటా సన్స్‌ బోర్డు కీలక నిర్ణయాలు తీసుకుంది. ఎన్. చంద్రశేఖరన్‌ను ప్రస్తుత పదవీకాలం ముగిసిన తర్వాత మరో ఐదేళ్ల పాటు ఎగ్జిక్యూటివ్‌ చైర్మన్‌గా కొనసాగించేందుకు మెజారిటీతో ఆమోదం తెలిపింది. అలాగే రిజర్వ్‌ బ్యాంక్‌ ఆఫ్‌ ఇండియా నిబంధనలకు అనుగుణంగా టాటా సన్స్‌ పబ్లిక్‌ లిస్టింగ్‌ ప్రక్రియను ముందుకు తీసుకెళ్లాలని నిర్ణయించింది. అయితే ఈ నిర్ణయాలకు టాటా ట్రస్ట్స్‌ వ్యతిరేకత వ్యక్తం చేసింది. ట్రస్ట్స్‌ ప్రకారం, చైర్మన్‌ పునర్నియామకంపై తమ నామినీ డైరెక్టర్ల మద్దతు అవసరం కాగా, నోయెల్‌ టాటా ఈ ప్రతిపాదనకు వ్యతిరేకంగా ఓటు వేశారు.

చంద్రశేఖరన్‌ గతంలో తన ప్రస్తుత పదవీకాలం ముగిసిన తర్వాత టాటా సన్స్‌ నుంచి వైదొలగనున్నట్లు ప్రకటించారు. అయితే బోర్డు చేసిన అభ్యర్థనతో ఆయన తన నిర్ణయాన్ని పునఃపరిశీలించేందుకు అంగీకరించారు. అనంతరం బోర్డు ఆయనను మరో ఐదేళ్లకు పునర్నియమించేందుకు తీర్మానం చేసింది. ఈ నిర్ణయంతో పాటు టాటా సన్స్‌ లిస్టింగ్‌ అంశం కూడా మరోసారి ప్రధానంగా మారింది. ఆర్‌బీఐ టాటా సన్స్‌ తన ఎన్‌బీఎఫ్‌సీ రిజిస్ట్రేషన్‌ను స్వచ్ఛందంగా రద్దు చేసుకునేందుకు చేసిన అభ్యర్థనను తిరస్కరించిన నేపథ్యంలో లిస్టింగ్‌ దిశగా బోర్డు నిర్ణయం తీసుకుంది. అయితే ఈ రెండు నిర్ణయాలకు ఏజీఎం ఆమోదం అవసరం.

టాటా ట్రస్ట్స్‌ మాత్రం టాటా సన్స్‌ లిస్టింగ్‌కు తాము అంగీకరించలేదని స్పష్టం చేసింది. లిస్టింగ్‌కు బదులుగా అందుబాటులో ఉన్న ఇతర మార్గాలను కూడా పరిశీలించాలని కోరినట్లు ట్రస్ట్స్‌ తెలిపింది. మరోవైపు, టాటా సన్స్‌లో టాటా ట్రస్ట్స్‌కు సుమారు 66 శాతం వాటా ఉండగా, షాపూర్జీ పల్లోంజీ గ్రూప్‌కు సుమారు 18 శాతం వాటా ఉంది. ఎస్‌పీ గ్రూప్‌ వాటాలో కొంత భాగాన్ని కొనుగోలు చేసి దానికి ద్రవ్య లభ్యత కల్పించే ప్రతిపాదనను నోయెల్‌ టాటా బోర్డు ముందు ఉంచినట్లు నివేదికలు పేర్కొంటున్నాయి. అయితే దీనిపై తుది ఒప్పందం కుదరలేదు. తాజా పరిణామాలతో టాటా సన్స్‌ పాలన, నాయకత్వం, లిస్టింగ్‌పై సంస్థలో విభేదాలు మరోసారి తెరపైకి వచ్చాయి.