యూపీఐ లావాదేవీల్లో రికార్డు

డిజిటల్ చెల్లింపులను అత్యంత సులభతరం చేసిన యూపీఐ సేవల ద్వారా గత ఆర్థిక సంవత్సరం 2025-26లో జరిగిన మొత్తం లావాదేవీల విలువ రూ.314 లక్షల కోట్లు దాటింది. దేశవ్యాప్తంగా నగదు రహిత చెల్లింపులకు యూపీఐ ప్రధాన వేదికగా మారింది.

జాతీయ చెల్లింపుల సంస్థ అభివృద్ధి చేసిన ఈ సేవలు 2016 ఆగస్టు 11న ప్రారంభమయ్యాయి. తొలి ఆర్థిక సంవత్సరం 2016-17లో కేవలం రూ.0.07 లక్షల కోట్ల లావాదేవీలు మాత్రమే నమోదయ్యాయి. గడిచిన పదేళ్లలో లావాదేవీల విలువ 4,000 రెట్లకు పైగా పెరగడం విశేషం.

అదే విధంగా 2016-17లో కేవలం 2 కోట్ల లావాదేవీలు జరగగా, 2025-26లో ఈ సంఖ్య 24,162 కోట్లకు చేరింది. గత ఏడాది ఆగస్టులో నెలవారీ లావాదేవీలు తొలిసారిగా 2,000 కోట్ల మైలురాయిని దాటగా, డిసెంబరులో 2,163 కోట్లతో కొత్త రికార్డు నమోదైంది. రోజుకు సగటున 60 కోట్ల లావాదేవీలు జరిగినట్లు గణాంకాలు వెల్లడించాయి.