టాటా సన్స్‌ పాలనపై ప్రభావం చూపనున్న ట్రస్టుల వివాదం?

టాటా ట్రస్ట్స్‌, టాటా సన్స్‌ మధ్య నాయకత్వం, పాలనకు సంబంధించిన వివాదం మరింత ముదురుతున్నట్లు తెలుస్తోంది. ఈ నేపథ్యంలో టాటా ట్రస్ట్స్‌ ఛైర్మన్‌ నోయెల్‌ టాటా, ఆయన కుమారుడు నెవిల్లె టాటా కలిసి సర్‌ దొరాబ్జీ టాటా ట్రస్ట్‌ (SDTT)కు చెందిన కొందరు ట్రస్టీలపై ముంబయి సిటీ సివిల్‌ కోర్టులో కేవియట్‌ పిటిషన్‌ దాఖలు చేసినట్లు జాతీయ మీడియా కథనాలు వెల్లడించాయి. ఈ పిటిషన్‌లో వేణు శ్రీనివాసన్‌, విజయ్‌ సింగ్‌, డారియస్‌ ఖంబటా, భాస్కర్‌ భట్‌ పేర్లు ఉన్నట్లు సమాచారం. టాటా సన్స్‌ ఛైర్మన్‌ ఎన్‌. చంద్రశేఖరన్‌ పదవీకాలం పొడిగింపుపై చర్చలు జరుగుతున్న సమయంలో ఈ పరిణామం చోటుచేసుకోవడం ప్రాధాన్యం సంతరించుకుంది. తమ వాదన వినకుండా తమకు వ్యతిరేకంగా ఉత్తర్వులు జారీ చేయకుండా చూడాలనే ఉద్దేశంతో కేవియట్‌ దాఖలు చేసినట్లు నివేదికలు పేర్కొంటున్నాయి.

టాటా ట్రస్ట్‌ ఛైర్మన్‌గా నోయెల్‌ టాటా పాత్రపై ట్రస్టీ, పారిశ్రామికవేత్త వేణు శ్రీనివాసన్‌ మహారాష్ట్ర ఛారిటీ కమిషనర్‌కు ఫిర్యాదు చేసినట్లు సమాచారం. టాటా సన్స్‌ నామినీలు, ప్రతినిధుల నియామకానికి సంబంధించిన కొన్ని నిర్ణయాల్లో నోయెల్‌ పాల్గొనకుండా, ఓటు వేయకుండా ఆంక్షలు విధించాలని ఆయన కోరినట్లు కథనాలు చెబుతున్నాయి. టాటా ట్రస్ట్స్‌ వాణిజ్య వ్యవహారాల్లో జోక్యం చేసుకుంటున్నాయన్న అంశంపైనా ఫిర్యాదులో అభ్యంతరాలు వ్యక్తమైనట్లు తెలుస్తోంది. ఈ ఫిర్యాదుపై అక్టోబర్‌ 19లోగా నోయెల్‌ సమాధానం ఇవ్వాల్సి ఉందని నివేదికలు పేర్కొన్నాయి. టాటా సన్స్‌లో టాటా ట్రస్ట్స్‌కు 66 శాతం వాటా ఉండటంతో, ఈ సంస్థల పాలనకు సంబంధించిన నిర్ణయాలు మొత్తం టాటా గ్రూప్‌పై ప్రభావం చూపే అవకాశం ఉంది. అయితే, ఈ వివాదంపై సంబంధిత పక్షాల అధికారిక స్పందన, న్యాయపరమైన పరిణామాలు కీలకం కానున్నాయి.