ఎన్‌సీసీకి ఎన్‌హెచ్‌ఏఐ భారీ షాక్

భారత జాతీయ రహదారుల అభివృద్ధి సంస్థ (ఎన్‌హెచ్‌ఏఐ) ఎన్‌సీసీ లిమిటెడ్‌కు భారీ షాక్ ఇచ్చింది. ఎన్‌సీసీతో పాటు దాని అనుబంధ సంస్థ ఓబీ ఇన్‌ఫ్రాస్ట్రక్చర్ లిమిటెడ్ (ఓబీఐఎల్)ను రెండేళ్ల పాటు ఎన్‌హెచ్‌ఏఐకి సంబంధించిన అన్ని టెండర్లు, కాంట్రాక్టుల్లో పాల్గొనకుండా నిషేధించింది. ఈ నెల 17వ తేదీ నుంచి ఈ ఆంక్షలు అమల్లోకి వచ్చినట్లు ఎన్‌సీసీ రెగ్యులేటరీ సంస్థలకు తెలియజేసింది. ఉత్తరప్రదేశ్‌లో బీఓటీ విధానంలో నిర్మించిన ఒక రహదారి ప్రాజెక్టు ఆలస్యంపై ఈ నిర్ణయం తీసుకున్నట్లు సంస్థ వెల్లడించింది.

అయితే, ప్రాజెక్టు ఆలస్యం ఎన్‌హెచ్‌ఏఐ భూమి సేకరణలో చేసిన జాప్యం కారణంగానే జరిగిందని ఎన్‌సీసీ వాదిస్తోంది. ఈ విషయంపై ఎన్‌సీసీ ఆర్బిట్రేషన్‌కు వెళ్లగా, 2024 నవంబరులో ఆర్బిట్రేషన్ ట్రైబ్యునల్ సంస్థకు అనుకూలంగా తీర్పు ఇచ్చింది. అయినప్పటికీ, ఆ నిర్ణయాన్ని ఎన్‌హెచ్‌ఏఐ ఢిల్లీ హైకోర్టులో సవాల్ చేసింది. కేసు విచారణ కొనసాగుతున్నప్పటికీ, ఎన్‌హెచ్‌ఏఐ ఏకపక్షంగా నిషేధం విధించిందని ఎన్‌సీసీ పేర్కొంది.