ఈవీ కార్ల విక్రయాల్లో అమెరికాను దాటేసిన భారత్

భారత్ ఎలక్ట్రిక్ వాహనాల మార్కెట్‌లో మరో కీలక మైలురాయిని చేరుకుంది. ఏప్రిల్ నెలలో దేశంలో అమ్ముడైన కొత్త కార్లలో ఎలక్ట్రిక్ కార్ల వాటా 5.8 శాతానికి చేరుకొని తొలిసారిగా అమెరికా సంయుక్త రాష్ట్రాలను అధిగమించింది. గతేడాది ఇదే సమయంలో ఈ వాటా 3.7 శాతంగా ఉండగా, మార్చిలో 5.1 శాతంగా నమోదైంది. కొత్త మోడళ్లు మార్కెట్లోకి రావడం, వినియోగదారుల ఆసక్తి పెరగడం, ఇంధన ధరల భయాలు పెరగడం ఈ వృద్ధికి ప్రధాన కారణాలుగా భావిస్తున్నారు.

అమెరికాలో ప్రస్తుతం ఎలక్ట్రిక్ కార్ల మార్కెట్ వాటా 5.1 శాతానికి తగ్గింది. అయితే మొత్తం అమ్మకాల పరంగా మాత్రం అమెరికా ఇప్పటికీ ముందంజలో ఉంది. దేశీయ మార్కెట్లో టాటా మోటార్స్ అగ్రస్థానంలో కొనసాగుతోంది. ఏప్రిల్‌లో టాటా మోటార్స్ 8,543 ఎలక్ట్రిక్ కార్లను విక్రయించగా, మహీంద్రా అండ్ మహీంద్రా మరియు జేఎస్‌డబ్ల్యూ ఎంజీ మోటార్ ఇండియా తదుపరి స్థానాల్లో నిలిచాయి. పశ్చిమాసియా ఉద్రిక్తతల కారణంగా ఇంధన ధరలు మరింత పెరిగే అవకాశం ఉండటంతో వినియోగదారులు ఎలక్ట్రిక్ వాహనాల వైపు మొగ్గు చూపుతున్నట్లు కంపెనీలు చెబుతున్నాయి.