రియల్ ఎస్టేట్ సామ్రాజ్యాన్ని విస్తరిస్తున్న అమెజాన్ అధినేత జెఫ్ బెజోస్

ప్రపంచ కుబేరుల్లో ఒకరైన అమెజాన్ వ్యవస్థాపకుడు జెఫ్ బెజోస్ తన రియల్ ఎస్టేట్ సామ్రాజ్యాన్ని మరింత విస్తరించినట్లు వార్తలు వెలువడుతున్నాయి. ఫ్లోరిడాలోని గోల్డెన్ బీచ్ ప్రాంతంలో 69.5 మిలియన్ డాలర్లు, అంటే సుమారు రూ.660 కోట్ల విలువైన బీచ్‌ఫ్రంట్ ప్రాపర్టీని ఆయన కొనుగోలు చేసినట్లు సమాచారం. అయితే, ఈ కొనుగోలుదారుని పేరు అధికారికంగా వెల్లడికాలేదు. రియల్ ఎస్టేట్ నిపుణులు మాత్రం ఈ ఆస్తిని బెజోస్ కొనుగోలు చేసి ఉండవచ్చని చెబుతున్నారు. సుమారు 17,500 చదరపు అడుగుల విస్తీర్ణంలో ఉన్న ఈ విలాసవంతమైన భవనంలో ఏడు బెడ్‌రూమ్‌లు, 12 బాత్‌రూమ్‌లు, గెస్ట్‌హౌస్, స్విమ్మింగ్ పూల్, స్పా వంటి సౌకర్యాలు ఉన్నాయి. సముద్ర తీరానికి నేరుగా సుమారు 100 అడుగుల ఫ్రంటేజ్ ఉండటం దీని ప్రత్యేకత.

మియామీలోని ‘బిలియనీర్స్ బంకర్’గా పేరొందిన ఇండియన్ క్రీక్ ప్రాంతంలో బెజోస్‌కు ఇప్పటికే విలువైన ఆస్తులు ఉన్నాయి. తాజాగా వార్తల్లోకి వచ్చిన గోల్డెన్ బీచ్ ప్రాపర్టీ అక్కడి నుంచి సుమారు 30 నిమిషాల ప్రయాణ దూరంలో ఉన్నట్లు తెలుస్తోంది. తన తల్లిదండ్రులకు దగ్గరగా ఉండటంతో పాటు, కేప్ కెనావెరాల్‌లోని బ్లూ ఆరిజిన్ అంతరిక్ష కార్యకలాపాలకు అనుకూలంగా ఉండేందుకు బెజోస్ 2023లో సియాటెల్ ప్రాంతం నుంచి ఫ్లోరిడాకు మారారు. వ్యక్తిగత ఆదాయంపై రాష్ట్ర పన్ను, రాష్ట్ర స్థాయి క్యాపిటల్ గెయిన్స్ పన్ను లేకపోవడం కూడా ఫ్లోరిడాను సంపన్నులకు ఆకర్షణీయంగా మారుస్తోంది. అయితే, ఈ తాజా ప్రాపర్టీ కొనుగోలు జెఫ్ బెజోస్‌దేనని అధికారికంగా నిర్ధారణ కాలేదు.