జియో ప్లాట్‌ఫామ్స్‌ ఐపీఓకు భారీ స్పందన, దరఖాస్తుల్లో రికార్డు

రిలయన్స్‌ ఇండస్ట్రీస్‌కు చెందిన డిజిటల్‌ సేవల సంస్థ జియో ప్లాట్‌ఫామ్స్‌ (జేపీఎల్‌) ఐపీఓకు మదుపర్ల నుంచి విశేష స్పందన లభించింది. రూ.30,213 కోట్లు సమీకరించే లక్ష్యంతో చేపట్టిన ఈ పబ్లిక్‌ ఇష్యూ శుక్రవారం ముగిసింది. ఆఫర్‌ చేసిన షేర్లకు 22.19 రెట్లు అధికంగా బిడ్లు వచ్చాయి. పబ్లిక్‌ ఇష్యూ, యాంకర్‌ ఇన్వెస్టర్లకు కేటాయించిన షేర్లకు కలిపి మొత్తం డిమాండ్‌ రూ.7.4 లక్షల కోట్లను దాటింది. దాదాపు 1.39 కోట్ల దరఖాస్తులు వచ్చాయి. యాంకర్‌ ఇన్వెస్టర్ల కేటాయింపులను మినహాయిస్తే, పబ్లిక్‌ ఇష్యూకే రూ.4.9 లక్షల కోట్లకు పైగా విలువైన బిడ్లు దాఖలయ్యాయి. రిటైల్‌ మదుపర్ల నుంచి వచ్చిన బిడ్ల విలువ రూ.25,867 కోట్లను మించింది.

సంస్థాగత పెట్టుబడిదారుల విభాగంలో అందుబాటులో ఉన్న షేర్లకు 70.55 రెట్లు అధికంగా బిడ్లు వచ్చాయి. దేశీయ బ్యాంకులు, ఆర్థిక సంస్థలు, బీమా సంస్థలు, విదేశీ సంస్థాగత పెట్టుబడిదారులు, మ్యూచువల్‌ ఫండ్లు భారీగా దరఖాస్తు చేశాయి. సంస్థాగతేతర పెట్టుబడిదారుల విభాగం 14 రెట్లు, వ్యక్తిగత మదుపర్ల విభాగం 2.72 రెట్లు అధికంగా సబ్‌స్క్రైబ్‌ అయ్యాయి. రిలయన్స్‌ ఇండస్ట్రీస్‌ వాటాదారుల విభాగంలో 7.60 రెట్లు, ఉద్యోగుల విభాగంలో 2.93 రెట్లు బిడ్లు నమోదయ్యాయి. ఈ నెల 19న 212 మంది యాంకర్‌ ఇన్వెస్టర్లకు రూ.8,110 కోట్ల విలువైన షేర్లను కేటాయించారు. 2024లో వారీ ఎనర్జీస్‌ ఐపీఓకు వచ్చిన దరఖాస్తుల రికార్డును జేపీఎల్‌ అధిగమించింది. ఈ ఐపీఓ అనంతరం జియో ప్లాట్‌ఫామ్స్‌ విలువ సుమారు 108 బిలియన్‌ డాలర్లు (రూ.10.26 లక్షల కోట్లు)గా ఉండవచ్చని అంచనా. సంస్థలో రిలయన్స్‌ ఇండస్ట్రీస్‌కు 66.4 శాతం వాటా ఉంది.