మళ్లీ అగ్రస్థానానికి చేరిన అదానీ కుటుంబం

ఎం3ఎం హురున్‌ ఇండియా సంపన్నుల జాబితా 2026 ప్రకారం.. అదానీ గ్రూప్‌ ఛైర్మన్‌ గౌతమ్‌ అదానీ, ఆయన కుటుంబం మరోసారి దేశంలోనే అత్యంత సంపన్నులుగా నిలిచారు. రిలయన్స్‌ ఇండస్ట్రీస్‌ ఛైర్మన్‌ ముకేశ్‌ అంబానీ కుటుంబాన్ని వెనక్కి నెట్టి అగ్రస్థానాన్ని దక్కించుకున్నారు. అదానీ కుటుంబ సంపద 13 శాతం పెరిగి రూ.9.23 లక్షల కోట్లకు, అంటే 9,600 కోట్ల డాలర్లకు చేరుకుంది. మరోవైపు అంబానీ కుటుంబ సంపద 10 శాతం తగ్గి రూ.8.63 లక్షల కోట్లకు పరిమితమైంది. ఈ రెండు కుటుంబాల సంపద మధ్య వ్యత్యాసం రూ.59,400 కోట్లుగా ఉంది.

ఆర్సెలార్‌ మిట్టల్‌కు చెందిన లక్ష్మీ నివాస్‌ మిట్టల్‌ కుటుంబం రూ.3.39 లక్షల కోట్ల సంపదతో మూడో స్థానంలో నిలిచింది. సీరమ్‌ ఇన్‌స్టిట్యూట్‌కు చెందిన సైరస్‌ పూనావాలా కుటుంబం నాలుగో స్థానంలో ఉండగా.. హెచ్‌సీఎల్‌కు చెందిన రోష్ని నాడార్‌ మల్హోత్రా, ఆదిత్య బిర్లా గ్రూప్‌ ఛైర్మన్‌ కుమార్‌ మంగళం బిర్లా, సన్‌ ఫార్మాస్యూటికల్స్‌కు చెందిన దిలీప్‌ సంఘ్వీ, విప్రోకు చెందిన అజీమ్‌ ప్రేమ్‌జీ తర్వాతి స్థానాల్లో ఉన్నారు. వేదాంతకు చెందిన అనిల్‌ అగర్వాల్‌ కుటుంబం రూ.2.08 లక్షల కోట్ల సంపదతో తొమ్మిదో స్థానానికి చేరగా టొరెంట్‌ ఫార్మాకు చెందిన సమీర్‌ మెహతా కుటుంబం పదో స్థానంలో నిలిచింది. గౌతమ్‌ అదానీ 2022లో ముఖేష్ అంబానీని అధిగమించి మొదటి స్థానానికి చేరుకున్నారు. 2023లో ఆ స్థానాన్ని కోల్పోయి, 2024లో తిరిగి దక్కించుకున్నారు. 2025లో మళ్లీ వెనుకబడిన ఆయన తాజాగా మరోసారి అగ్రస్థానాన్ని సాధించారు.

హురున్‌ జాబితాలో కృత్రిమ మేధ తొలిసారిగా ప్రత్యేక రంగంగా చోటు దక్కించుకుంది. ఈ రంగానికి చెందిన 19 మంది మొత్తం రూ.3.07 లక్షల కోట్ల సంపదను కలిగి ఉన్నారు. బెంగళూరుకు చెందిన క్యూపీఐఏఐ వ్యవస్థాపకుడు నాగేంద్ర నాగరాజ రూ.1,700 కోట్ల సంపదతో క్వాంటమ్‌ కంప్యూటింగ్‌ రంగం నుంచి జాబితాలో చోటు సంపాదించిన తొలి వ్యక్తిగా నిలిచారు. జాబితాలోని వారిలో 70 శాతం మంది స్వయంకృషితో ఎదిగిన పారిశ్రామికవేత్తలే. ఐదేళ్ల క్రితం ఈ వాటా 55 శాతంగా ఉండగా, ప్రస్తుతం వారి సంఖ్య 1,266కు చేరింది. కనీసం రూ.1,000 కోట్ల సంపద కలిగిన వారి సంఖ్య 128 పెరిగి 1,810కి చేరుకుంది. వీరి మొత్తం సంపద 12.8 శాతం వృద్ధితో రూ.187.5 లక్షల కోట్లకు చేరిందని, ఇది దేశ స్థూల దేశీయోత్పత్తిలో దాదాపు సగభాగమని హురున్‌ తెలిపింది. ఈ ఏడాది 27 మంది కొత్తగా డాలర్‌ బిలియనీర్లుగా చేరడంతో మొత్తం సంఖ్య 391కి పెరిగింది. ముంబై నుంచి 465 మంది, ఢిల్లీ నుంచి 236 మంది, బెంగళూరు నుంచి 129 మంది జాబితాలో ఉన్నారు. ఇందులో 131 మంది మహిళలు ఉండగా, రోష్ని నాడార్‌ మల్హోత్రా దేశంలోనే అత్యంత సంపన్న మహిళగా నిలిచారు. జాబితాలోని 156 మంది విదేశాల్లో నివసిస్తున్నారు. వారిలో 90 మంది అమెరికాలో, 31 మంది యునైటెడ్‌ అరబ్‌ ఎమిరేట్స్‌లో ఉన్నారు.