మూరత్ ట్రేడింగ్‌లో మార్కెట్లకు ఎదురుదెబ్బ.. నష్టాలతో ముగిసిన సూచీలు

కొత్త సంవత్‌ 2083ను పురస్కరించుకుని దీపావళి సందర్భంగా నిర్వహించిన ప్రత్యేక మూరత్ ట్రేడింగ్‌లో దేశీయ స్టాక్ మార్కెట్ సూచీలు స్వల్ప నష్టాలతో ముగిశాయి. సాధారణంగా మూరత్ ట్రేడింగ్‌లో మార్కెట్లు లాభాలతో ముగుస్తుంటాయి. అయితే ఈసారి అందుకు భిన్నంగా నష్టాలను నమోదు చేశాయి. 2018 తర్వాత మళ్లీ మూరత్ ట్రేడింగ్‌లో సూచీలు నష్టాల్లో ముగియడం ఇదే తొలిసారి.

మధ్యాహ్నం 2.20 గంటలకు సుమారు 270 పాయింట్ల లాభంతో 81,299.34 వద్ద ప్రారంభమైన సెన్సెక్స్.. 80,932.42 నుంచి 81,442.11 మధ్య కదలాడి, చివరకు 28.62 పాయింట్ల నష్టంతో 80,999.40 వద్ద ముగిసింది. మరోవైపు 40 పాయింట్ల లాభంతో 25,070.45 వద్ద ట్రేడింగ్ ప్రారంభించిన నిఫ్టీ.. చివరకు 43.95 పాయింట్లు కోల్పోయి 24,986.40 వద్ద స్థిరపడింది. సెన్సెక్స్‌ 30లో మహీంద్రా అండ్‌ మహీంద్రా, ఇండిగో, ట్రెంట్‌, ఇన్ఫోసిస్‌, భారతీ ఎయిర్‌టెల్‌ షేర్లు నష్టపోగా.. సన్‌ఫార్మా, టాటా స్టీల్‌, మారుతీ సుజుకీ, పవర్‌గ్రిడ్‌, అదానీ పోర్ట్స్‌ షేర్లు లాభపడ్డాయి. దీపావళి సందర్భంగా స్టాక్‌ ఎక్స్ఛేంజీలు నిర్వహించే ప్రత్యేక సెషన్‌నే మూరత్‌ ట్రేడింగ్‌ అంటారు. హిందూ సంప్రదాయం ప్రకారం కొత్త సంవత్‌ ప్రారంభాన్ని సూచించే ఈ సమయంలో పెట్టుబడులు ప్రారంభించడం శుభప్రదంగా భావిస్తారు.