గూగుల్ ఇయర్ ఇన్ సెర్చ్ 2025 - భారత సెర్చ్‌లను ప్రభావితం చేసిన ఏఐ!

గూగుల్ గురువారం ‘ఇయర్ ఇన్ సెర్చ్ 2025’ నివేదికను విడుదల చేసింది. ఈ ఏడాది భారతీయులు గూగుల్‌లో ఏవేవి ఎక్కువగా వెతికారో ఇందులో వెల్లడించింది. భారతదేశంలో అత్యధికంగా ట్రెండ్ అయిన సెర్చ్‌గా ఇండియన్ ప్రీమియర్ లీగ్ మొదటి స్థానంలో నిలిచింది. దేశవ్యాప్తంగా క్రికెట్‌పై ఉన్న అపారమైన అభిమానం దీని ద్వారా మరోసారి స్పష్టమైంది. ఆశ్చర్యకరంగా, గూగుల్ ఏఐ చాట్‌బాట్ అయిన జెమిని రెండో స్థానాన్ని పొందింది. ఆసియా కప్, ఐసీసీ ఛాంపియన్స్ ట్రోఫీ, ఉమెన్స్ వరల్డ్ కప్ వంటి ఇతర క్రికెట్ ఈవెంట్లు కూడా టాప్ 10 జాబితాలో చోటు దక్కించుకున్నాయి. మహా కుంభమేళా, సయ్యారా, ధర్మేంద్ర వంటి సెర్చ్ పదాలు కూడా గణనీయంగా ట్రెండ్ అయ్యాయి.

ఏఐ విభాగంలో జెమిని మొదటి స్థానంలో నిలవగా, డీప్‌సీక్, పర్ప్లెక్సిటీ, ఎలాన్ మస్క్ గ్రోక్ తరువాతి స్థానాలను దక్కించుకున్నాయి. చాట్‌జిపిటి ఏడవ స్థానంలో నిలిచింది. గిబ్లీ ఆర్ట్ ట్రెండ్ కూడా టాప్ ట్రెండ్స్‌లో చోటు సంపాదించింది. సినిమా సెర్చ్‌లలో సయ్యారా, కాంతారా: ఏ లెజెండ్ చాప్టర్ – 1, కూలీ, వార్ 2, సనమ్ తేరి కసమ్ మొదటి ఐదు స్థానాల్లో నిలిచాయి. టీవీ షోస్ విషయానికి వస్తే స్క్విడ్ గేమ్, పంచాయత్, బిగ్ బాస్, ద బ్యాడ్స్ ఆఫ్ బాలీవుడ్, పాతాళ్ లోక్ ఎక్కువగా వెతికిన షోలుగా నిలిచాయి.