ఏఐతో ఐటీ ఉద్యోగాలకు ముప్పు తప్పదా? టీసీఎస్ సీఈఓ ఏమన్నారంటే!

కృత్రిమ మేధ (AI)పై పెరుగుతున్న పెట్టుబడులు సంప్రదాయ ఐటీ సేవల వృద్ధిని ప్రభావితం చేయవచ్చని టీసీఎస్ సీఈఓ కృతివాసన్ తెలిపారు. కంపెనీలు ఏఐ, నూతన సాంకేతిక సేవలపై భారీగా పెట్టుబడులు పెడుతున్నాయని, దీంతో సంప్రదాయ సేవల వృద్ధి నెమ్మదించే అవకాశం ఉందని పేర్కొన్నారు. అయితే, ఏఐ ఆధారిత సేవల విస్తరణ ద్వారా ఈ తగ్గుదలను భర్తీ చేయవచ్చని వివరించారు. భౌగోళిక రాజకీయ ఉద్రిక్తతలు, సుంకాలు, ప్రపంచ ఆర్థిక అనిశ్చితి కొనసాగుతున్నప్పటికీ టెక్నాలజీపై పెట్టుబడులు పెట్టేందుకు సంస్థలు ఆసక్తి చూపుతున్నాయని చెప్పారు. గత ఆరు నెలల్లో వినియోగదారులు ఆర్థిక అనిశ్చితి కంటే ఏఐ అందించే అవకాశాలపై ఎక్కువగా దృష్టి సారిస్తున్నారని వెల్లడించారు.

మరోవైపు, ఏఐ వల్ల ఉద్యోగాలపై ప్రతికూల ప్రభావం పడుతుందనే ఆందోళనలను టీసీఎస్ సీఓఓ ఆర్తి సుబ్రమణియన్ ప్రస్తావిస్తూ, ఏఐ ఉద్యోగుల సామర్థ్యాన్ని పెంచే సాధనంగా ఉపయోగపడుతుందని పేర్కొన్నారు. ఉద్యోగులను తగ్గించడమే లక్ష్యంగా కాకుండా, వారిని కొత్త కస్టమర్ ప్రాజెక్టులపై పనిచేసేలా మళ్లించాలని సంస్థ భావిస్తోందని తెలిపారు. టీసీఎస్ వార్షిక ఏఐ ఆదాయం 3 బిలియన్ డాలర్లను దాటినట్లు వచ్చిన సమాచారం నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి. సంస్థ వ్యాపారంలో పదో వంతు కంటే ఎక్కువ వాటాను ఏఐ సేవలు సాధించినట్లు నివేదిక పేర్కొంది. భవిష్యత్తులో సంస్థ వృద్ధికి ఏఐ కీలకంగా మారనుందని టీసీఎస్ నాయకత్వం భావిస్తోంది.