మెటాకు గట్టి పోటీగా గూగుల్ స్మార్ట్ గ్లాసెస్..

గూగుల్ మరియు సామ్‌సంగ్ కలిసి రూపొందించిన తదుపరి తరం Android XR ఆధారిత స్మార్ట్ గ్లాసెస్‌ను Google I/O 2026 కార్యక్రమంలో అధికారికంగా ప్రదర్శించాయి. ఈ కొత్త ఏఐ స్మార్ట్ గ్లాసెస్ ప్రపంచ టెక్ మార్కెట్‌లో భారీ చర్చకు దారితీశాయి. ఆడియో ఏఐ గ్లాసెస్‌తో పాటు డిస్‌ప్లే కలిగిన స్మార్ట్ గ్లాసెస్‌ను కూడా విడుదల చేయాలని కంపెనీలు భావిస్తున్నాయి. తాజాగా విడుదలైన Smart Analytics Global (SAG) నివేదిక ప్రకారం, సరఫరా సమస్యలు లేకపోతే గూగుల్ ఈ స్మార్ట్ గ్లాసెస్‌ను ప్రపంచవ్యాప్తంగా రెండు మిలియన్లకు పైగా అమ్మే అవకాశం ఉందని అంచనా వేసింది. దీంతో మెటా తర్వాత ఏఐ స్మార్ట్ గ్లాసెస్ రంగంలో గూగుల్ రెండో అతిపెద్ద కంపెనీగా మారే అవకాశాలు కనిపిస్తున్నాయి.

ఈ ప్రాజెక్ట్ కోసం గూగుల్ ప్రముఖ కళ్లజోడు బ్రాండ్లు Warby Parker మరియు Gentle Monster‌లతో భాగస్వామ్యం కుదుర్చుకుంది. ఈ భాగస్వామ్యం ద్వారా ప్రీమియం మరియు సాధారణ వినియోగదారులను ఒకేసారి ఆకర్షించగలమని విశ్లేషకులు భావిస్తున్నారు. మరోవైపు, 2026లో గ్లోబల్ ఏఐ స్మార్ట్ గ్లాసెస్ మార్కెట్ 85 శాతం వృద్ధి చెంది 15 మిలియన్ యూనిట్లకు పైగా చేరుకునే అవకాశముందని SAG నివేదిక పేర్కొంది. ముఖ్యంగా తక్కువ బరువు, తక్కువ ధర, ప్రైవసీ సమస్యలు తక్కువగా ఉండటం వల్ల ఆడియో ఏఐ స్మార్ట్ గ్లాసెస్ మార్కెట్‌లో ఎక్కువ ఆదరణ పొందనున్నాయని అంచనా వేస్తున్నారు.