కెప్టెన్‌గా విజయాలు ఉన్నా.. బ్యాటర్‌గా శ్రేయస్‌ అయ్యర్‌కు అసలైన పరీక్ష

న్యూజిలాండ్‌తో టీ20 సిరీస్‌లో భారత్ ఇప్పటికే ఆధిక్యం సాధించినప్పటికీ.. నాలుగో మ్యాచ్‌లో ఎదురైన ఘోర పరాజయం కెప్టెన్‌ శ్రేయస్‌ అయ్యర్‌పై విమర్శలకు దారితీసింది. కెప్టెన్‌గా ఇప్పటివరకు 25 మ్యాచ్‌ల్లో 14 విజయాలు, 9 ఓటములు నమోదు చేసిన అతడి రికార్డు బాగానే కనిపిస్తున్నా.. వ్యక్తిగత బ్యాటింగ్‌ ప్రదర్శన మాత్రం ఆందోళన కలిగిస్తోంది. కివీస్‌తో జరిగిన నాలుగో టీ20లో 260 పరుగుల లక్ష్య ఛేదనలో శ్రేయస్‌ 11 బంతుల్లో 22 పరుగులు చేసి కీలక సమయంలో వికెట్‌ కోల్పోయాడు. ఈ సిరీస్‌లో నాలుగు మ్యాచ్‌లు ఆడిన అతడు మొత్తం 76 పరుగులే చేశాడు. వేగంగా పరుగులు సాధించడంతో పాటు కీలక సమయాల్లో భాగస్వామ్యాలు నిర్మించడంలోనూ విఫలమయ్యాడనే విమర్శలు వస్తున్నాయి.

మరోవైపు, సూర్యకుమార్‌ యాదవ్‌ నాయకత్వంలో భారత్‌ ప్రపంచకప్‌ గెలిచినా.. బ్యాటింగ్‌లో ఆశించిన స్థాయిలో రాణించకపోవడంతో అతడు జట్టులో స్థానం కోల్పోయాడనే ఉదాహరణను విశ్లేషకులు ప్రస్తావిస్తున్నారు. సూర్యతో పోలిస్తే శ్రేయస్‌ కూడా కెప్టెన్‌గా ఉన్న సమయంలో బ్యాటింగ్‌లో మరింత మెరుగుపడాల్సిన అవసరం ఉందని అభిప్రాయపడుతున్నారు. ఇంగ్లాండ్‌తో జరిగిన మ్యాచ్‌లో 125 పరుగులు, న్యూజిలాండ్‌తో జరిగిన నాలుగో టీ20లో 87 పరుగుల తేడాతో భారత్‌ ఓడిపోవడం కూడా అతడి కెప్టెన్సీపై ప్రశ్నలు రేకెత్తిస్తోంది. బౌలర్లను సరైన సమయంలో వినియోగించుకోవడంలో శ్రేయస్‌ ఇబ్బంది పడుతున్నాడని మాజీ క్రికెటర్‌ మహ్మద్‌ కైఫ్‌ అభిప్రాయపడ్డాడు. ముఖ్యంగా డెత్‌ ఓవర్లలో ప్రధాన బౌలర్లకు బాధ్యతలు అప్పగించడంతో పాటు నితీశ్‌ కుమార్‌ రెడ్డిని మధ్య ఓవర్లలో బౌలింగ్‌కు ఉపయోగించుకోవాలని సూచించాడు. 2028 టీ20 ప్రపంచకప్‌లో భారత జట్టుకు నాయకత్వం వహించాలనే లక్ష్యం ఉంటే.. శ్రేయస్‌ తన బ్యాటింగ్‌, కెప్టెన్సీ రెండింటిపైనా దృష్టి పెట్టాల్సి ఉంది.