భారత్‌-ఆఫ్ఘనిస్థాన్‌ క్వార్టర్‌ఫైనల్‌కు వర్షం ముప్పు..

2026 ఆసియా క్రీడల్లో క్రికెట్‌ స్వర్ణ పతకాన్ని నిలబెట్టుకోవాలనే లక్ష్యంతో బరిలోకి దిగుతున్న భారత జట్టుకు తొలి మ్యాచ్‌కు ముందే వర్షం రూపంలో సవాల్‌ ఎదురైంది. జపాన్‌లోని నిస్షిన్‌ నగరంలోని కొరోగి స్పోర్ట్స్‌ పార్క్‌లో సోమవారం, సెప్టెంబర్‌ 28న ఆఫ్ఘనిస్థాన్‌తో భారత్‌ క్వార్టర్‌ఫైనల్‌ ఆడనుంది. అందుబాటులో ఉన్న వాతావరణ అంచనాల ప్రకారం మ్యాచ్‌ ప్రారంభ సమయంలో వర్షం కురిసే అవకాశం 70 శాతంగా ఉండగా, మేఘావృతం 97 శాతంగా ఉంటుందని అంచనా. సాయంత్రానికి వర్షం ముప్పు మరింత పెరిగే అవకాశం ఉంది.

ఒకవేళ వర్షం కారణంగా మ్యాచ్‌ పూర్తిగా రద్దయితే.. టోర్నమెంట్‌ నిబంధనల ప్రకారం మెరుగైన సీడింగ్‌ ఉన్న భారత్‌ నేరుగా సెమీఫైనల్‌కు చేరుతుంది. భారత్‌, ఆఫ్ఘనిస్థాన్‌ మధ్య ఇప్పటివరకు జరిగిన 13 టీ20 మ్యాచ్‌ల్లో భారత్‌ 12 విజయాలు సాధించగా, ఒక మ్యాచ్‌ ఫలితం లేకుండా ముగిసింది. ఇటీవల జరిగిన మూడు మ్యాచ్‌ల టీ20 సిరీస్‌ను కూడా భారత్‌ 3-0తో క్లీన్‌స్వీప్‌ చేసింది. వాతావరణ పరిస్థితులు ఎలా ఉన్నా ఎదుర్కొనేందుకు మానసికంగా సిద్ధంగా ఉన్నామని కెప్టెన్‌ శ్రేయస్‌ అయ్యర్‌ పేర్కొన్నారు.