అన్ని జిల్లాల్లో క్రికెట్‌ అభివృద్ధి- హెచ్‌సీఏ

తెలంగాణలోని మొత్తం 33 జిల్లాల్లో క్రికెట్ అభివృద్ధికి హైదరాబాద్ క్రికెట్ అసోసియేషన్ (హెచ్‌సీఏ) సమగ్ర రోడ్‌మ్యాప్‌ను సిద్ధం చేస్తోంది. జంట నగరాలకే పరిమితం కాకుండా రాష్ట్రవ్యాప్తంగా క్రికెట్ ప్రతిభను గుర్తించి, యువ ఆటగాళ్లకు మెరుగైన అవకాశాలు కల్పించడమే లక్ష్యంగా ఈ ప్రణాళికను రూపొందిస్తున్నట్లు హెచ్‌సీఏ జిల్లా క్రికెట్ మౌలిక సదుపాయాల అభివృద్ధి కమిటీ చైర్మన్ టి. శేష్ నారాయణ్ తెలిపారు. ఉప్పల్ స్టేడియంలో జిల్లా క్రికెట్ సంఘాల కార్యదర్శులతో నిర్వహించిన సమావేశంలో ఆయన ఈ వివరాలను వెల్లడించారు.

తెలంగాణ రాష్ట్రం ఏర్పడిన తర్వాత కొత్త జిల్లాలకు హెచ్‌సీఏ సభ్యత్వం కల్పించే ప్రక్రియకు కొంత సమయం పడుతుందని ఆయన తెలిపారు. ఈలోగా అన్ని జిల్లాల్లో కార్యాలయాలు ఏర్పాటు చేసి, సహాయక సిబ్బంది, గ్రౌండ్ సిబ్బందిని నియమించనున్నట్లు చెప్పారు. యువ ఆటగాళ్ల కోసం వర్క్‌షాప్‌లు నిర్వహించే మాజీ క్రికెటర్లకు వసతి కల్పించే ఏర్పాట్లు కూడా చేయనున్నట్లు వెల్లడించారు. రాబోయే రెండు వారాల్లో తగిన మైదానాలు, కార్యాలయాలను గుర్తించాలని జిల్లా ప్రతినిధులను కోరినట్లు తెలిపారు. జోనల్ అకాడమీలతో పాటు జోనల్ స్థాయిలో టీ10 టోర్నమెంట్లు నిర్వహించి యువ క్రీడాకారులకు తమ ప్రతిభను చాటుకునే అవకాశం కల్పించనున్నట్లు చెప్పారు.