తొలి వన్డేకు ముందు గిల్‌ ఫిట్‌నెస్‌పై క్లారిటీ

వెస్టిండీస్‌తో తొలి వన్డేకు ముందు టీమిండియాకు ఊరట లభించింది. కెప్టెన్‌ శుభ్‌మన్‌ గిల్‌ తొలి మ్యాచ్‌కు పూర్తిగా ఫిట్‌గా ఉన్నాడని బ్యాటింగ్‌ కోచ్‌ సితాన్షు కోటక్‌ స్పష్టం చేశాడు. శుక్రవారం ప్రాక్టీస్‌ సమయంలో మహ్మద్‌ సిరాజ్‌ వేసిన బంతి గిల్‌ కుడి మోచేతికి బలంగా తగిలింది. దీంతో దాదాపు 20 నిమిషాల పాటు మైదానంలో చికిత్స తీసుకున్న గిల్‌.. ఆ తర్వాత నెట్స్‌లో త్రోడౌన్స్‌ ఎదుర్కొన్నాడు. దీంతో తొలి వన్డేకు ఆయన అందుబాటుపై నెలకొన్న సందేహాలకు తెరపడింది.

జట్టులో చోటు కోసం నెలకొన్న తీవ్ర పోటీ, యశస్వి జైస్వాల్‌కు పరిమిత అవకాశాలపైనా కోటక్‌ స్పందించాడు. జట్టులో ఉన్న పోటీ కారణంగానే జైస్వాల్‌ అవకాశాల కోసం ఎదురుచూడాల్సి వస్తోందని తెలిపాడు. తన నైపుణ్యాలు, ప్రాక్టీస్‌, సన్నద్ధతపై జైస్వాల్‌ నిరంతరం దృష్టి పెడుతున్నాడని పేర్కొన్నాడు. రవీంద్ర జడేజా విషయంలోనూ కోటక్‌ కీలక వ్యాఖ్యలు చేశాడు. బ్యాటింగ్‌, బౌలింగ్‌తో పాటు ఫీల్డింగ్‌లోనూ జడేజా కీలక ఆటగాడని, అతడి అనుభవం టీమిండియాకు ఎంతో విలువైనదని చెప్పాడు.