కొరియా మాస్టర్స్‌లో అస్మిత చాలిహా సంచలనం..

భారత యువ షట్లర్‌ అస్మిత చాలిహా అద్భుత ప్రదర్శనతో కొరియా మాస్టర్స్‌ సూపర్‌ 300 టైటిల్‌ను కైవసం చేసుకుంది. మహిళల సింగిల్స్‌ ఫైనల్లో నాలుగో సీడ్‌ హన్‌ కియాన్‌గ్జినుపై 14-21, 21-14, 21-14తో విజయం సాధించింది. తొలి గేమ్‌లో తడబడినప్పటికీ.. ఆ తర్వాత పుంజుకున్న అస్మిత రెండో, మూడో గేమ్‌లలో ఆధిపత్యం ప్రదర్శించి టైటిల్‌ను సొంతం చేసుకుంది. ఈ క్రమంలో క్వార్టర్‌ఫైనల్లో టాప్‌ సీడ్‌ అకెచి (జపాన్‌)ను ఓడించి సంచలనం సృష్టించింది. 26 ఏళ్ల అస్మితకు ఇదే తొలి బీడబ్ల్యూఎఫ్‌ వరల్డ్‌ టూర్‌ టైటిల్‌.

అస్మితకు ఈ విజయం ప్రత్యేకమైనది. 2024 ఆగస్టులో కొరియా ఓపెన్‌ సందర్భంగా కుడి మోకాలికి గాయం కావడంతో శస్త్రచికిత్స చేయించుకుంది. 2025 ఫిబ్రవరిలో పునరాగమనం చేసిన ఆమె వరుసగా 14 టోర్నీల్లో పాల్గొంది. ఈ సీజన్‌లో చైనా మాస్టర్స్‌, మలేసియా మాస్టర్స్‌లో క్వార్టర్‌ఫైనల్‌కు, మకావు ఓపెన్‌లో సెమీఫైనల్‌కు చేరుకుంది. కీలక సమయాల్లో చేసిన తప్పిదాల కారణంగా గతంలో టైటిళ్లు చేజార్చుకున్నా.. కొరియా మాస్టర్స్‌లో వాటిని అధిగమించి విజేతగా నిలిచింది. ఈ విజయం నమ్మశక్యంగా అనిపించడం లేదని, మరిన్ని టైటిళ్లు సాధించడమే తన లక్ష్యమని అస్మిత తెలిపింది.