తండ్రికి ఇచ్చిన మాట నిలబెట్టుకున్న ఆర్యవీర్.. అదిరిపోయే సెంచరీ!

భారత మాజీ ఓపెనర్ వీరేంద్ర సెహ్వాగ్ తన దూకుడైన బ్యాటింగ్‌తో ప్రపంచవ్యాప్తంగా గుర్తింపు పొందారు. ఇప్పుడు ఆయన కుమారుడు ఆర్యవీర్ సెహ్వాగ్ కూడా క్రికెట్‌లో తనదైన ముద్ర వేస్తున్నాడు. అండర్-19 వన్డే ఆసియా కప్ 2026లో భాగంగా యూఏఈతో జరిగిన కీలక గ్రూప్-ఏ మ్యాచ్‌లో ఆర్యవీర్ అద్భుతంగా ఆడాడు. 168 బంతుల్లో 17 ఫోర్లు, 7 సిక్సర్లతో 160 పరుగులు సాధించాడు. కెప్టెన్ లక్ష్య రాయ్‌చందానితో కలిసి తొలి వికెట్‌కు 67 పరుగులు జోడించాడు. అనంతరం వికే వినీత్‌తో కలిసి రెండో వికెట్‌కు 193 పరుగుల భారీ భాగస్వామ్యాన్ని నెలకొల్పాడు. వినీత్ 67 పరుగులు చేశాడు. 131 బంతుల్లో సెంచరీ పూర్తి చేసుకున్న ఆర్యవీర్, ఆ తర్వాత కూడా దూకుడుగా ఆడి 150 పరుగుల మైలురాయిని అందుకున్నాడు. 45వ ఓవర్‌లో నసీమ్ ఖాన్ బౌలింగ్‌లో ఉద్దీష్ సూరికి క్యాచ్ ఇచ్చి ఔటయ్యాడు. అతడి ఇన్నింగ్స్‌కు ప్లేయర్ ఆఫ్ ద మ్యాచ్ అవార్డు లభించింది.

తన ప్రదర్శన గురించి ఆర్యవీర్ మాట్లాడుతూ, పిచ్‌పై బంతి తిరుగుతుండటంతో ఆరంభంలో కొంత ఇబ్బంది ఎదురైందని తెలిపాడు. అయితే 40 ఓవర్లకు పైగా క్రీజులో ఉండి భారీ స్కోరు చేయాలని ముందుగానే నిర్ణయించుకున్నట్లు చెప్పాడు. మ్యాచ్‌కు ముందు తన తండ్రి వీరేంద్ర సెహ్వాగ్‌కు భారీ స్కోరు చేస్తానని మాట ఇచ్చానని వెల్లడించాడు. తండ్రి వారసత్వాన్ని కొనసాగించాలని ఉందని, ఆయనకు కూడా భారీ సెంచరీలంటే ఎంతో ఇష్టమని పేర్కొన్నాడు. మరోవైపు, భారత్ నిర్దేశించిన 310 పరుగుల లక్ష్యాన్ని ఛేదించే క్రమంలో యూఏఈ 239 పరుగులకే ఆలౌటైంది. దీంతో టీమిండియా 70 పరుగుల తేడాతో విజయం సాధించింది. భారత బౌలర్ ఈశాన్ సూద్ 37 పరుగులు ఇచ్చి నాలుగు వికెట్లు పడగొట్టాడు. పాకిస్థాన్‌తో ఓటమి తర్వాత సెమీఫైనల్ చేరాలంటే తప్పనిసరిగా గెలవాల్సిన ఈ మ్యాచ్‌లో భారత్ విజయం సాధించి తదుపరి దశకు అర్హత పొందింది. నవంబర్ 12న జరిగే సెమీఫైనల్‌లో ఆఫ్ఘనిస్థాన్‌తో తలపడనుంది.