టైటిల్ ఓటమి తర్వాత సబలెంకాకు మరో షాక్

యూఎస్ ఓపెన్ ఫైనల్లో ఎలెనా రిబకినా చేతిలో ఓటమి అనంతరం ఆర్యనా సబలెంకా ఆగ్రహానికి గురయ్యారు. మ్యాచ్ సందర్భంగా ప్రేక్షకుల వైపు బంతిని కొట్టడంతో కోడ్ ఉల్లంఘనకు పాల్పడిన ఆమె.. మ్యాచ్ ముగిసిన తర్వాత బెంచ్ వద్ద రాకెట్‌ను పలుమార్లు నేలకు కొట్టి విరగ్గొట్టారు. ఈ ప్రవర్తనకు యునైటెడ్ స్టేట్స్ టెన్నిస్ అసోసియేషన్ ఆమెకు 7,500 డాలర్ల జరిమానా విధించింది.

ఫైనల్లో సబలెంకా 6-4, 5-7, 6-2తో రిబకినా చేతిలో ఓడిపోయారు. దీంతో వరుసగా మూడోసారి యూఎస్ ఓపెన్ టైటిల్ గెలవాలన్న ఆమె ఆశ నెరవేరలేదు. ఫ్లషింగ్ మెడోస్‌లో వరుసగా 20 విజయాల తర్వాత ఆమె పరాజయం చవిచూశారు. అంతేకాకుండా 2026లో ఒక్క గ్రాండ్‌స్లామ్ టైటిల్ కూడా గెలవకుండానే సీజన్‌ను ముగించారు. మార్చిలో ఇండియన్ వెల్స్, మియామి ఓపెన్ టైటిళ్లను గెలుచుకున్న సబలెంకా.. ఆ తర్వాత మరో టైటిల్ సాధించలేకపోయారు.

ఈ విజయంతో రిబకినా యూఎస్ ఓపెన్ టైటిల్‌తో పాటు ప్రపంచ నంబర్ వన్ ర్యాంకును కూడా సొంతం చేసుకున్నారు. తాజా ర్యాంకింగ్స్‌లో రిబకినా 9,901 పాయింట్లతో అగ్రస్థానంలో ఉండగా, సబలెంకా 7,875 పాయింట్లతో రెండో స్థానంలో నిలిచారు. జెస్సికా పెగులా 7,265 పాయింట్లతో మూడో స్థానంలో, కోకో గాఫ్ 7,244 పాయింట్లతో నాలుగో స్థానంలో ఉన్నారు.