బిగ్‌బాస్ 10లోకి స్టార్ యూట్యూబర్.. ఈసారి హౌస్‌లోకి వచ్చేది అతడేనా?

బిగ్‌బాస్ తెలుగు సీజన్ 10 మరికొద్ది రోజుల్లో ప్రారంభం కానుండటంతో షోపై ఆసక్తి రోజురోజుకూ పెరుగుతోంది. సామాన్యులకు అవకాశం కల్పించేందుకు ప్రస్తుతం అగ్నిపరీక్ష నిర్వహిస్తున్నారు. మరోవైపు సెలబ్రిటీ కంటెస్టెంట్ల ఎంపిక ప్రక్రియను కూడా బిగ్ బాస్ నిర్వాహకులు కొనసాగిస్తున్నట్లు తెలుస్తోంది. ఇప్పటికే పలువురు ప్రముఖుల పేర్లు ఈ సీజన్‌లో కంటెస్టెంట్లుగా ఎంట్రీ ఇవ్వబోతున్నారంటూ సోషల్ మీడియాలో ప్రచారం జరుగుతోంది.

పల్లవి గౌడ, తేజస్విని గౌడ, రాకింగ్ రాకేష్, వర్ష, పవిత్ర, వర్షిణి, నందూస్ వరల్డ్ నందు, ఎక్స్‌ప్రెస్ హరి, నూకరాజు, పండు మాస్టర్, జ్యోతి, రాయల్ ఎంసీ రమణ, చంద్రహాస్ తదితరుల పేర్లు వినిపిస్తున్నాయి. తాజాగా ఈ జాబితాలో ప్రముఖ యూట్యూబర్ నిఖిల్ విజయేంద్ర సింహ పేరు కూడా చేరింది. బిగ్‌బాస్ టీమ్ ఇప్పటికే నిఖిల్‌తో సంప్రదింపులు జరిపినట్లు, ఆయన కూడా షోలోకి రావడానికి సానుకూలంగా స్పందించినట్లు వార్తలు వస్తున్నాయి. అయితే ఆయన ఎంట్రీపై అధికారిక ప్రకటన రావాల్సి ఉంది. ఈసారి బిగ్‌బాస్ హౌస్‌లోకి ఎవరెవరు అడుగుపెడతారో అనే ఆసక్తి ప్రేక్షకుల్లో నెలకొంది.