పెట్టుబడుల కేంద్రంగా ఆంధ్రప్రదేశ్

విశాఖలో జరిగిన పెట్టుబడుల సదస్సులో ముఖ్యమంత్రి చంద్రబాబు మాట్లాడుతూ ఆంధ్రప్రదేశ్ దేశానికి ప్రధాన ద్వారంగా మారుతున్నదని అన్నారు. పెట్టుబడులు పెట్టాలనుకునే కంపెనీలకు ఏపీ మంచి ప్రదేశంగా మారుతోందని చెప్పారు. ఈ సదస్సుకు 72 దేశాల ప్రతినిధులు వచ్చారని సీఎం గుర్తు చేశారు. విశాఖలో ఎన్నో అవకాశాలు ఉన్నాయని, కేంద్ర ప్రభుత్వం కూడా ఇటీవల దీనిని సురక్షిత నగరంగా ప్రకటించిందని చెప్పారు. పెట్టుబడిదారులకు కావాల్సిన అనుమతులు చాలా త్వరగా ఇవ్వడానికి ప్రభుత్వం సింగిల్ విండో విధానాన్ని బలపరుస్తున్నట్టు వివరించారు.

2047 నాటికి భారత్ ప్రపంచంలో నంబర్ వన్ ఆర్థిక వ్యవస్థగా ఎదగాలని కేంద్రం లక్ష్యంగా పెట్టుకున్నట్టు, అదే దిశగా ఆంధ్రప్రదేశ్ కూడా ముందుకు వెళ్లాలని చంద్రబాబు చెప్పారు. ఏపీ ప్రభుత్వం “ఇంటి కొక పారిశ్రామికవేత్త” అనే భావనతో పనిచేస్తోందని ఆయన అన్నారు. కేవలం మాటలు కాదు, పనిలో కూడా చూపిస్తున్నామని చెప్పారు. రాష్ట్రంలో స్పేస్ సిటీ, డ్రోన్ సిటీ, ఎలక్ట్రానిక్స్ సిటీ, క్వాంటమ్ వ్యాలీ, గ్రీన్ హైడ్రోజన్ వ్యాలీ వంటి పెద్ద ప్రాజెక్టులు వచ్చే రోజుల్లో రాబోతున్నాయని తెలిపారు. వచ్చే సంవత్సరం జనవరిలో అమరావతిలో క్వాంటమ్ వ్యాలీ నిర్మాణానికి శ్రీకారం చుడతామని చెప్పారు.

పునరుత్పాదక ఇంధన రంగంలో  సౌరశక్తి, గాలిశక్తి, పంప్డ్ ఎనర్జీ వంటి విభాగాల్లో ఏపీ ముందున్నదని సీఎం చెప్పారు. రాష్ట్రంలోని అరకు కాఫీ, కొండపల్లి బొమ్మలు, పొందూరు ఖద్ధరు వంటి స్థానిక ఉత్పత్తులు ప్రపంచవ్యాప్తంగా పేరు తెచ్చుకుంటున్నట్టు వివరించారు. వ్యాపారాలు చేసే వారికి ప్రభుత్వం అన్ని విధాల ప్రోత్సాహం ఇస్తోందని చెప్పారు. రెండు సంవత్సరాల్లో డ్రోన్ ట్యాక్సీలు కూడా ఉపయోగంలోకి రావచ్చని వెల్లడించారు.

2024 నుండి ఇప్పటి వరకు పారిశ్రామికవేత్తలకు సహాయపడేలా 27 కొత్త పాలసీలు తీసుకువచ్చామని చంద్రబాబు తెలిపారు. పెట్టుబడిదారులకు ఎస్క్రో అకౌంట్లు కూడా ఇవ్వాలని ప్రభుత్వం నిర్ణయించిందన్నారు. వచ్చే మూడేళ్లలో 20 లక్షల ఉద్యోగాలు ఇవ్వాలన్నదే తమ లక్ష్యమని, రాబోయే పదేళ్లలో రాష్ట్రానికి ట్రిలియన్ డాలర్ల పెట్టుబడులు రావాలని ప్రభుత్వం కృషి చేస్తోందని సీఎం చెప్పారు. రాష్ట్రాభివృద్ధిలో పర్యాటక రంగం కూడా పెద్ద పాత్ర పోషిస్తుందని తెలిపారు.