తమిళనాడు ఎన్నికల్లో టీవీకే ఖర్చు రూ.19.81 కోట్లు.. ఎక్కడెక్కడ ఎంతంటే?

నటుడు విజయ్ నేతృత్వంలోని తమిళగ వెట్రి కళగం (టీవీకే) 2026 తమిళనాడు అసెంబ్లీ ఎన్నికలకు సంబంధించిన తన ఎన్నికల వ్యయాన్ని వెల్లడించింది. ఎన్నికల సంఘానికి సమర్పించిన వ్యయ నివేదిక ప్రకారం పార్టీ మొత్తం రూ.19.81 కోట్లు ఖర్చు చేసింది. ఇందులో విజయ్‌ విమాన ప్రయాణాలకు రూ.3.55 కోట్లు, ప్రింట్, ఎలక్ట్రానిక్ మీడియా, రేడియో ప్రకటనలకు రూ.6.35 కోట్లు ఖర్చు చేసినట్లు పేర్కొంది. సభలు, రోడ్‌షోలకు రూ.2.06 కోట్లు వెచ్చించింది.

తమిళనాడులోని 234 అసెంబ్లీ స్థానాల్లో 233 స్థానాల్లో టీవీకే పోటీ చేసి 108 స్థానాల్లో విజయం సాధించింది. ప్రచార సామగ్రి కోసం రూ.40.55 లక్షలు ఖర్చు చేసినట్లు నివేదికలో పేర్కొంది. ఎన్నికల సమయంలో పార్టీకి రూ.7.02 కోట్ల ఆదాయం వచ్చినట్లు, ఎన్నికలు ప్రకటించిన సమయంలో ప్రారంభ నిల్వ రూ.3.03 కోట్లు ఉన్నట్లు వెల్లడించింది. ఇదే సమయంలో డీఎంకే రూ.197.84 కోట్లు, అన్నాడీఎంకే రూ.112.39 కోట్ల ఎన్నికల వ్యయాన్ని నివేదించినట్లు అందుబాటులో ఉన్న వివరాలు పేర్కొంటున్నాయి.