స్పీకర్‌పై వ్యాఖ్యల కేసు.. బీఆర్‌ఎస్ ఎమ్మెల్సీల బెయిల్ రద్దు కోరిన ప్రభుత్వం

తెలంగాణ అసెంబ్లీ స్పీకర్ గడ్డం ప్రసాద్ కుమార్‌పై అనుచిత వ్యాఖ్యలు చేశారనే ఆరోపణలతో నమోదైన కేసులో బీఆర్‌ఎస్ ఎమ్మెల్సీలు తాత మధు, నవీన్ కుమార్ రెడ్డిలకు మంజూరైన బెయిల్‌ను రద్దు చేయాలని రాష్ట్ర ప్రభుత్వం హైకోర్టును ఆశ్రయించింది. అసెంబ్లీ సమావేశాల సమయంలో చోటుచేసుకున్న పరిణామాల నేపథ్యంలో ఈ ఇద్దరు ఎమ్మెల్సీలపై కేసు నమోదైంది. అనంతరం నాంపల్లి కోర్టు వారికి బెయిల్ మంజూరు చేసింది. అయితే ఆ బెయిల్ ఉత్తర్వులను సవాల్ చేస్తూ పోలీసులు హైకోర్టులో క్రిమినల్ పిటిషన్ దాఖలు చేశారు. తదుపరి విచారణ కోసం వారిని అరెస్ట్ చేసేందుకు అనుమతి ఇవ్వాలని ప్రభుత్వం కోరింది.

విచారణ సందర్భంగా ప్రభుత్వం, పోలీసుల తరఫున స్టేట్ పబ్లిక్ ప్రాసిక్యూటర్ పల్లె నాగేశ్వర్‌రావు వాదనలు వినిపించారు. ఎమ్మెల్సీలు ఉద్దేశపూర్వకంగానే స్పీకర్‌పై అభ్యంతరకర వ్యాఖ్యలు చేశారని పేర్కొంటూ, దిగువ కోర్టు మంజూరు చేసిన బెయిల్‌ను రద్దు చేయాలని కోరారు. మరోవైపు, ఎమ్మెల్సీల తరఫు న్యాయవాది ఈ ఆరోపణలను ఖండించారు. తమ క్లయింట్లు స్పీకర్‌ను దూషించలేదని వాదించారు. ఇరుపక్షాల వాదనలు విన్న హైకోర్టు తీర్పును రిజర్వ్ చేసింది. ఈ పిటిషన్‌పై న్యాయస్థానం వెలువరించే నిర్ణయంపై ఆసక్తి నెలకొంది.