తమిళనాడులో ఆర్‌టీఐపై కీలక నిర్ణయం..

తమిళనాడు ప్రభుత్వం ఇటీవల జారీ చేసిన కీలక ఉత్తర్వులను వెనక్కి తీసుకుంది. పబ్లిక్‌ (శాంతిభద్రతలు) విభాగాన్ని సమాచార హక్కు చట్టం (RTI) పరిధి నుంచి మినహాయిస్తూ సెప్టెంబర్‌ 21న జారీ చేసిన నోటిఫికేషన్‌ను తాజాగా రద్దు చేసింది. ఈ విభాగాన్ని ఆర్‌టీఐ చట్టంలోని సెక్షన్‌ 24(4) కింద ‘ఇంటెలిజెన్స్‌ అండ్‌ సెక్యూరిటీ ఆర్గనైజేషన్‌’గా పేర్కొంటూ మినహాయింపు ఇచ్చింది. ఈ నిర్ణయంపై రాజకీయ పార్టీలు, హక్కుల కార్యకర్తలు, పారదర్శకతను కోరే వర్గాల నుంచి విమర్శలు వ్యక్తమయ్యాయి.

ఈ మినహాయింపు అమల్లోకి వచ్చి ఉంటే పోలీసు చర్యలు, కస్టడీ మరణాలు, పోలీసుల చిత్రహింసలు, నిరసనలు, సామాజిక ఘర్షణలు వంటి శాంతిభద్రతలకు సంబంధించిన పలు అంశాలపై ఆర్‌టీఐ ద్వారా సమాచారాన్ని పొందే అవకాశం పరిమితమయ్యేది. విమర్శలు వెల్లువెత్తిన నేపథ్యంలో ప్రభుత్వం సెప్టెంబర్‌ 27న మినహాయింపును రద్దు చేస్తున్నట్లు ప్రకటించింది. దీంతో ఈ అంశంపై తలెత్తిన వివాదానికి ప్రస్తుతానికి తెరపడింది.