ముంబయి మేయర్‌గా రితూ తావ్డే

ముంబయి మేయర్ పదవికి అధికార మహాయుతి కూటమి బీజేపీ కార్పొరేటర్ రితూ తావ్డేను ఖరారు చేసింది. పార్టీ అగ్ర నాయకత్వంతో సంప్రదింపుల అనంతరం ఈ నిర్ణయం తీసుకున్నట్లు బీజేపీ నేత అమిత్ సతమ్ తెలిపారు. డిప్యూటీ మేయర్ పదవికి షిండే వర్గానికి చెందిన సంజయ్ ఘాడీని ఎంపిక చేశారు.

ఈ విజయంతో ఆసియాలోనే అత్యంత సంపన్నమైన మున్సిపల్ కార్పొరేషన్ పాలన బీజేపీ షిండే కూటమి చేతుల్లోకి వెళ్లింది. అభివృద్ధికి ప్రజలు పట్టం కట్టారని, డబుల్ ఇంజిన్ ప్రభుత్వంపై ఉన్న నమ్మకాన్ని ఈ ఫలితాలు స్పష్టం చేశాయని మహారాష్ట్ర ముఖ్యమంత్రి దేవేంద్ర ఫడ్నవీస్ వ్యాఖ్యానించారు. మొత్తం 227 స్థానాలకు జరిగిన ఎన్నికల్లో మహాయుతి కూటమి 118 సీట్లు గెలుచుకుని స్పష్టమైన మెజారిటీ సాధించింది. ఇందులో బీజేపీ 89, శివసేన (షిండే) 29 స్థానాలు దక్కించుకున్నాయి.