ఈసీపై అనుమానాలు.. సుప్రీంకోర్టు జోక్యం కోరిన కేటీఆర్!

భారత ఎన్నికల సంఘం పనితీరుపై వస్తున్న ఆందోళనల నేపథ్యంలో బీఆర్‌ఎస్‌ వర్కింగ్‌ ప్రెసిడెంట్‌ కే తారకరామారావు సుప్రీంకోర్టు జోక్యాన్ని కోరారు. ఎస్‌ఐఆర్‌ ప్రక్రియకు సంబంధించి ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి లేవనెత్తిన అభ్యంతరాలు పలు ప్రశ్నలు, అనుమానాలకు దారితీశాయని ఆయన అన్నారు. అయితే, ఈ అంశాలపై ఈసీ స్పందిస్తూ.. అవి అంతర్గత చర్చల్లో భాగమేనని, ఎస్‌ఐఆర్‌కు సంబంధించిన నిర్ణయాలు ఏకగ్రీవంగానే తీసుకున్నామని స్పష్టం చేసింది.

ఎన్నికల సంఘం రాజ్యాంగబద్ధమైన సంస్థ కావడంతో అది ఎలాంటి అనుమానాలకు తావులేకుండా నిష్పక్షపాతంగా పనిచేయాల్సిన అవసరం ఉందని కేటీఆర్‌ పేర్కొన్నారు. ఈ వ్యవహారంపై సుప్రీంకోర్టు సుమోటోగా విచారణ చేపట్టి వాస్తవాలను వెలుగులోకి తీసుకురావాలని కోరారు. గతంలో ఎన్నికల కమిషనర్లుగా పనిచేసినవారు వ్యక్తం చేస్తున్న ఆందోళనలను కూడా అత్యున్నత న్యాయస్థానం పరిగణనలోకి తీసుకోవాలని అన్నారు. సుప్రీంకోర్టు పర్యవేక్షణలో విచారణ జరిగితే ఎన్నికల ప్రక్రియపై నెలకొన్న సందేహాలకు సమాధానాలు లభించి, ప్రజల్లో విశ్వాసం పునరుద్ధరించేందుకు దోహదపడుతుందని కేటీఆర్‌ అభిప్రాయపడ్డారు.