హసీనా అప్పగింతపై అసదుజ్జమాన్ కీలక వ్యాఖ్యలు

భారత్‌లో ఆశ్రయం పొందుతున్న బంగ్లాదేశ్ మాజీ ప్రధాని షేక్ హసీనాను తిరిగి స్వదేశానికి తీసుకొచ్చేందుకు తమ ప్రభుత్వం అన్ని చట్టపరమైన ప్రయత్నాలు చేస్తోందని ఆ దేశ న్యాయశాఖ మంత్రి అసదుజ్జమాన్ తెలిపారు. హసీనాను అప్పగించాలని భారత్‌కు ఇప్పటికే అప్పగింత ఒప్పందం ప్రకారం విజ్ఞప్తులు చేసినట్లు వెల్లడించారు. తమ ట్రైబ్యునల్ ఆమెను దోషిగా నిర్ధారించిందని, బంగ్లాదేశ్ దృష్టిలో ఆమెకు అదే గుర్తింపు అని వ్యాఖ్యానించారు.

ఈ వ్యవహారంలో న్యాయశాఖకు ప్రత్యక్ష ప్రమేయం లేదని, అప్పగింత ప్రక్రియను హోం మంత్రిత్వ శాఖ పర్యవేక్షిస్తోందని అసదుజ్జమాన్ పేర్కొన్నారు. భారత్‌ ఆమెను అప్పగిస్తే ఎలాంటి భావోద్వేగాలకు తావులేకుండా చట్ట ప్రకారం తదుపరి చర్యలు తీసుకుంటామని స్పష్టం చేశారు. హసీనాను తిరిగి తీసుకురావడానికి అవసరమైన ప్రక్రియను నిబంధనలకు అనుగుణంగానే కొనసాగిస్తామని చెప్పారు.