గడ్కరీతో కోమటిరెడ్డి భేటీ.. కీలక ప్రాజెక్టులపై చర్చ

ఢిల్లీలో కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీతో తెలంగాణ రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్‌రెడ్డి ప్రత్యేకంగా సమావేశమయ్యారు. ఈ భేటీలో తెలంగాణలో చేపట్టనున్న పలు కీలక మౌలిక వసతుల ప్రాజెక్టులపై చర్చించారు. ఎల్బీనగర్‌–హయత్‌నగర్‌ రెండు అంతస్తుల ఎగువ రహదారికి కేంద్ర మంత్రి ఆమోదం తెలిపినట్లు వెల్లడించారు. కృష్ణా నదిపై ప్రత్యేక ఆకర్షణగా నిలిచే తీగల వంతెన నిర్మాణానికి శంకుస్థాపన చేసే ప్రతిపాదనకు కూడా ఆమోదం లభించింది. ఈ వంతెన నిర్మాణంతో జాతీయ రహదారి 167కే ద్వారా తెలంగాణ, ఆంధ్రప్రదేశ్‌ మధ్య రాకపోకలు మెరుగుపడటంతో పాటు రవాణా, పర్యాటక రంగాలకు ప్రయోజనం చేకూరనుంది. హైదరాబాద్‌–శ్రీశైలం జాతీయ రహదారి 765పై ఎగువ రహదారి నిర్మాణానికి సంబంధించి కొత్త సమగ్ర ప్రాజెక్టు నివేదికను సిద్ధం చేయాలని గడ్కరీ అధికారులను ఆదేశించారు. పర్వతమాల పథకం కింద తెలంగాణలో ఐదు తాడు మార్గాల ఏర్పాటుకు ఆమోదం లభించగా, హైదరాబాద్‌–అమరావతి కొత్త హరిత రహదారి ప్రతిపాదనపై కూడా కేంద్ర మంత్రి సానుకూలంగా స్పందించారు.

ఇదే సమావేశంలో సేతు బంధన్‌ పథకం కింద మూడు రైల్వే పైవంతెనల నిర్మాణానికి ఆమోదం లభించింది. తెలంగాణలో 34 పనులకు కేంద్ర రహదారి, మౌలిక వసతుల నిధి నుంచి నిధులు మంజూరు చేయాలని కోమటిరెడ్డి కోరగా, సంబంధిత అధికారులకు అవసరమైన చర్యలు తీసుకోవాలని గడ్కరీ సూచించారు. పుల్లూరు–అలంపూర్‌–జట్రపోలు–పెంట్లవెల్లి–కొల్లాపూర్‌–లింగాల–అచ్చంపేట–డిండి–దేవరకొండ–మల్లేపల్లి–నల్గొండ రాష్ట్ర రహదారులను జాతీయ రహదారులుగా మార్చాలన్న ప్రతిపాదనపైనా కేంద్ర మంత్రి సానుకూలంగా స్పందించారు. హైదరాబాద్‌లో నవంబర్‌ 19 నుంచి 22 వరకు జరగనున్న భారత రహదారుల కాంగ్రెస్‌ సమావేశాలకు కోమటిరెడ్డి గడ్కరీని ఆహ్వానించారు. ఈ ఆహ్వానానికి ఆయన సానుకూలంగా స్పందించి, కార్యక్రమానికి హాజరవుతానని తెలిపినట్లు సమాచారం.