లక్ష కోట్ల ఆరోపణలు నిజమైతే ఆస్తులు తీసుకోండి - కేటీఆర్

కేసీఆర్ కుటుంబం లక్ష కోట్ల రూపాయల విలువైన ఆస్తులు కూడబెట్టిందన్న ముఖ్యమంత్రి రేవంత్ రెడ్డి ఆరోపణలపై బీఆర్‌ఎస్ వర్కింగ్ ప్రెసిడెంట్ కేటీఆర్ స్పందించారు. ఆ ఆరోపణలు నిజమని నిరూపిస్తే తమ కుటుంబ ఆస్తులను ప్రభుత్వానికి అప్పగించేందుకు సిద్ధమని, ముందుగా తమకు వెయ్యి కోట్లు ఇచ్చి మిగిలిన రూ.99 వేల కోట్లను ప్రభుత్వమే తీసుకోవాలని ఆయన సవాల్ చేశారు. ఒకవేళ ఆరోపణలను నిరూపించలేకపోతే రేవంత్ రెడ్డి వాటిని ఉపసంహరించుకుని కేసీఆర్‌కు క్షమాపణ చెప్పాలని డిమాండ్ చేశారు. ఈ ఆరోపణలు రాజకీయంగా చేసినవేనని కేటీఆర్ పేర్కొనగా, ప్రభుత్వం మాత్రం భూ వ్యవహారాలపై విచారణకు ఆదేశించింది.

కేసీఆర్ ఫాంహౌస్‌ భూముల విషయంలోనూ కేటీఆర్ పలు ప్రశ్నలు సంధించారు. గతంలో వెయ్యి ఎకరాల ఫాంహౌస్‌ ఉందని ప్రచారం చేసిన రేవంత్ రెడ్డి, ప్రస్తుతం అసెంబ్లీలో 67 ఎకరాల గురించి ప్రస్తావిస్తున్నారని కేటీఆర్ అన్నారు. మిగిలిన 933 ఎకరాలు ఎక్కడ ఉన్నాయో వెల్లడించాలని డిమాండ్ చేశారు. కేసీఆర్ ఎన్నికల అఫిడవిట్‌లో 67 ఎకరాల వివరాలు వెల్లడించారని ఆయన పేర్కొన్నారు. ఎన్ని కేసులు పెట్టినా, ఎన్ని కమిషన్లు వేసినా తాము ఎదుర్కొంటామని, రేవంత్ రెడ్డి అసమర్థ పాలకుడిగా మిగిలిపోతారని కేటీఆర్ విమర్శించారు.