హరీశ్ రావు పరువు నష్టం కేసు.. మహేష్ గౌడ్, అద్దంకి దయాకర్‌కు కోర్టు సమన్లు

మాజీ మంత్రి, బీఆర్‌ఎస్ నేత హరీశ్ రావు దాఖలు చేసిన పరువు నష్టం దావా కేసులో టీపీసీసీ అధ్యక్షుడు మహేష్ కుమార్ గౌడ్, ఎమ్మెల్సీ అద్దంకి దయాకర్‌కు నాంపల్లి ప్రజాప్రతినిధుల ప్రత్యేక కోర్టు సమన్లు జారీ చేసింది. అక్టోబర్ 29న విచారణకు వ్యక్తిగతంగా హాజరు కావాలని ఇద్దరు కాంగ్రెస్ నేతలను న్యాయస్థానం ఆదేశించింది.

తనపై నిరాధారమైన, తప్పుడు ఆరోపణలు చేశారంటూ హరీశ్ రావు గతంలో ప్రజాప్రతినిధుల కోర్టును ఆశ్రయించారు. ఆయన దాఖలు చేసిన పిటిషన్‌ను విచారణకు స్వీకరించిన న్యాయస్థానం, మహేష్ కుమార్ గౌడ్, అద్దంకి దయాకర్‌లకు సమన్లు పంపించింది. ఈ కేసులో తదుపరి విచారణ అక్టోబర్ 29న జరగనుంది. ఆరోపణలపై న్యాయస్థానంలో విచారణ కొనసాగనుండగా, కేసులో తదుపరి పరిణామాలపై రాజకీయ వర్గాల్లో ఆసక్తి నెలకొంది.