వెళ్లిపోయిన పరిశ్రమ మళ్లీ ఏపీకి… లోకేష్ సెన్సేషన్

ఆంధ్రప్రదేశ్‌లో పెట్టుబడుల వాతావరణం మళ్లీ చురుకుగా మారుతున్నదని మంత్రి నారా లోకేష్ తెలిపారు. భారీ పెట్టుబడికి సంబంధించిన సమాచారం పంచుతూ చేసిన తాజా ట్వీట్ రాజకీయ వర్గాల్లో చర్చనీయాంశంగా మారింది. లోకేష్ పేర్కొన్నదాని ప్రకారం  జగన్ ప్రభుత్వ కాలంలో రాష్ట్రం నుంచి వెళ్లిపోయిన ఒక ప్రముఖ పరిశ్రమ, తిరిగి ఆంధ్రప్రదేశ్‌లో పెట్టుబడులు పెట్టేందుకు ముందుకు వస్తోందని వెల్లడించారు. ఆయన గుర్తుచేస్తూ, 2019 లో ఆ సంస్థ కొత్త ప్రాజెక్టులను నిలిపివేసింది, కానీ ఇప్పుడు “తుఫాన్ వేగంతో తిరిగి ఏపీ వైపు అడుగులు వేస్తోంది” అని తెలిపారు.

విశాఖపట్నంలో నేడు ముఖ్యమంత్రి చంద్రబాబు నాయుడు మరియు మంత్రి లోకేష్ పర్యటన ఉండగా, ఈ నేపథ్యంలో పలు కీలక ఒప్పందాలు కుదురుకునే అవకాశముంది. పెట్టుబడిదారులతో సీఎం, మంత్రుల సమావేశాలు జరగనున్నాయి. అలాగే, పలు అభివృద్ధి కార్యక్రమాలకు లోకేష్ శంకుస్థాపనలు చేయనున్నట్లు అధికార వర్గాలు తెలిపాయి. సీఎం చంద్రబాబు నేడు ఇండియా–యూరప్ బిజినెస్ మీట్లో పాల్గొని గ్రీన్ షిఫ్ట్, సస్టైనబుల్ ఇన్నోవేషన్, యూరోపియన్ పెట్టుబడులపై చర్చించనున్నారు. సాయంత్రం ‘విశాఖ ఎకనమిక్ రీజియన్’ ఈవెంట్‌లో పాల్గొననున్నారు. రాత్రి ‘సీఐఐ నేషనల్ స్పెషల్ మీటింగ్’కు ముఖ్య అతిథిగా హాజరవుతారు.